Б.Үенч

Зоонозын өвчин судлалын үндэсний төвөөс хоёр жил тутамд уламжлал болгон зохион байгуулдаг “Зоонозын өвчнүүдийн тулгамдсан асуудал” олон улсын эрдэм шинжилгээний хурал өнөөдөр боллоо. Эрдэм шинжилгээний хуралд ЗӨСҮТ, аймаг, нийслэлийн ЗӨСТ, ХӨСҮТ, НЭМҮХ, МХЕГ, ОБЕГ, НЭМГ, АШУҮИС, МУИС болон ОХУ, БНХАУ, Казахстан улсын хамтын ажиллагаатай байгууллагуудын нийт 100 гаруй эрдэмтэн судлаач, эмч, мэргэжилтнүүд оролцлоо.

Хурлын зорилго нь зоонозын халдварт өвчинтэй тэмцэх үйл ажиллагаанд үндэсний төдийгүй олон улсын хэмжээнд ижил төстэй үйл ажиллагаа явуулдаг мэргэжлийн байгууллагуудтай харилцан мэдээ, мэдээлэл солилцох, туршлага хуваалцах, хамтын ажиллагааг хөгжүүлэхэд чиглэгджээ. Зоонозын халдварт өвчлөлд нь малаас хүнд халддаг халдварт өвчин болох тарваган тахал, боом, бруцеллёз, дамжуулагчаар дамждаг халдварууд ордог байна. Дамжуулагчаар дамжих халдвар нь хачигаар дамждаг бөгөөд манай улсад энэ төрлийн халдвар  эрс нэмэгджээ. Өнгөрсөн жил гэхэд 600-700 орчим тохиолдол бүртгэгддэг байсан бол энэ оны эхний хагас  жилийн байдлаар 1200 орчим тохиолдол бүртгэгдсэн  тухай зоонозын өвчин судлалын  үндэсний төв захиргаа төлөвлөлт хүний нөөц статистик албаны дарга Б. Амгаланбаяр мэдээлэв.

Эх сурвалж: www.polit.mn