Т.БАТСАЙХАН

Германы аялагч Роберт Моор Монголд ирлээ. Тэрээр цахилгаан дугуйгаар дэлхийг тойрох аяллаа өнгөрсөн тавдугаар сарын 16-нд Норвегийн Осло хотоос эхлүүлжээ. Норвеги, Швед, Латви, ОХУ-аар дамжин ийнхүү манай улсад аяллаа үргэлжлүүлж байгаа юм байна. Тэрээр дугуйныхаа өмнө “2017 оны Гиннесийн амжилт” хэмээн бичжээ. Түүний аяллын зорилго нь Гиннесийн амжилтыг эвдэх гэнэ.  Цахилгаан дугуйгаар дөрвөн сарын хугацаанд 12400 км замыг туулсан нь дэлхийн дээд амжилтад бүртгэгдсэн байдаг ажээ. Харин Роберт Моор энэ хугацаанд 24 мянган км замыг туулах зорилготойгоор  аяллаа эхлүүлсэн байна.  Аяллын хугацаанд 10 гаруй орноор дамжин өнгөрөх бөгөөд Монголд ирснээр замынхаа яг дунд ирлээ гэж байв. Одоо Хятад,  АНУ, Португаль, Испани, Франц, Герман улсаар орох юм байна. Тэрээр “Монголчууд маш эелдэг ард түмэн юм.  Би ОХУ-аас Баян-Өлгий аймгаар дамжин орж ирсэн. Замдаа таарсан айлуудад хонож байлаа. Монголын зам хад чулуу ихтэй жаахан хүндрэлтэй байсан. Тэр үед дугуйгаа автобусаар тээвэрлэсэн. Ямартай ч аялал маань амжилттай үргэлжилж байгаад баяртай байна” гэлээ.  Тэрээр сэтгүүлч мэргэжилтэй бөгөөд 1992 онд цахилгаан машинаар мөн ийм аялал хийж байжээ. Ингэхдээ найман сарын турш аялж 32 мянган км замыг туулсан байна.  Харин энэ удаа хүн төрөлхтөнд дугуйн ач холбогдлыг сурталчлах мөн Гиннесийн амжилтыг эвдэх зорилгоор эктсрем аяллаа үргэлжлүүлж байна. Түүний унадаг дугуй долоон цаг орчим цэнэглэхэд 700 орчим км замыг туулдаг юм байна. Роберт Моор маргааш Бээжин хот руу хөдлөх бөгөөд ирэх есдүгээр сард Германы Мьюнхэн хотноо аяллаа өндөрлүүлнэ гэв.

Эх сурвалж: “Зууны мэдээ” сонин