Ц.ОЮУНГЭРЭЛ

Автомашины хүнгэнэх чимээ, микро автобусны кондукторын орилох дуу, хоорондоо чанга ярилцах хүн хонь, хурга нийлсэн мэт шаагилдана. Энэ бол Хархорин захын ойролцоох явган хүний зам. Худалдаа эрхлэх зөвшөөрөлгүй иргэд энэхүү газрыг эзлэн суужээ. Тэд ногоон хурганы арьс, нохойн битүү туурайнаас бусад нь гэдэг шиг алт, мөнгөн эдлэлээс эхлээд одон медаль, тогооны таг, сэтэрхий шаазан аяга, хүүхдийн уранхай гутал зэргийг өмнөө даавуу дэлгэж өрөөд суучихна.  Ил задгай худалдаа эрхэлдэгчдийн цар хүрээ БГД-ийн 20 дугаар хороо, “Барс 2” худалдааны төвөөс зүүн тийш Хархорин хороолол хүртэл, төв замын хойд хэсэг буюу СХД-ийн 15 дугаар хорооны нутаг дэвсгэр 19 дүгээр байрны урд талын автобусны буудлын ойр орчмыг хамардаг. БГД-ийн 20 дугаар хорооны олон нийтийн цагдаа С.Чулуунбаатар “Эдгээр худалдаа эрхлэгчид хууль зөрчиж байна.  Ил задгай худалдааг дагалдан бусад хууль, дүрэм давхар зөрчих асуудал гардаг. Яг энэ хавьд камерын хяналт байхгүйг далимдуулан халаасны хулгай, дээрэм гардаг. Мөн гудамжинд хэрүүл маргаан, зодоон үүсгэнэ. Давхар тамхины хяналтын тухайхууль гээд араасаа олон асуудал дагуулж байна даа” гэлээ.  Худалдаа эрхлэгчдийн зүүн захад, гар утасны хуучин гэр, цэнэглэгч, холбогч, гэх сэлбэг, хэрэгслээр дагнасан эмэгтэй сууна. Түүнийг Сарангэрэл гэдэг. Тэрээр“Би хууль зөрчиж, зөвшөөрөлгүй газар худалдаа эрхэлж байгаагаа сайн мэдэж байна. Бидний ойр орчимд бас хэцүү хүмүүс байгаа л даа. Архи уудаг хүмүүс байна, хулгайч гээд л. Гэхдээ надад энд ингэж наймаа хийхээс өөр ямар ч арга алга даа” хэмээн тайлбарлав. Захын зүүн хэсэг орчим цас хаялсан мэт барилгын хөөсөнцөрийн үйрмэг бужигнана. Баригдаж буй барилгаас тусгаарлах төмөр хашааны ёроол нус, цэр, бөөлжис, тамхины иш, хогоор дүүрчээ. Хаа нэг салхи сэвэлзэхэд шээс, шивтэрийн үнэр сэн хийж, хамар цоргино. Эрүүл ахуйн тухай хуульд нийтийн эзэмшлийн газар, орон сууцны орчныг нус, шүлс, цэр, тамхины иш, гэрийн тэжээвэр амьтны ялгадсаар бохирдуулах, зориулалтын бус газарт бие засах, хог хаягдлыг ил задгай хаяхыг хориглосон заалт байдаг.  Мөн гудамжинд ил задгай бие засна гэдэг бусдыг үл хүндэтгэсэн гэх үндэслэлээр зөрчлийн тухай хууль хэрэгжээд эхэллээ.  Мөн тус захын ойролцоо байдаг “Эрин” хороололд амьдардаг оршин суугчдаас зарим зүйлийг тодрууллаа.  Оршин суугчид “Энэ хавиар явахад хэцүү байдаг. Согтуу, хөлчүү хүмүүс ихтэй. Би явган хүний замаар явж чаддаггүй , шороон замаар явбал амар байдаг. Манай хорооллын булан тохой, хүүхдийн тоглоомын талбай гэх мэт ойр орчимд архи ууж, ил задгай бие засаад сууж байгаа хүмүүс мэр, сэр харагддаг.” гэлээ.2015 оны тавдугаар сард Хархорин захын ойролцоох явган зорчигч, нийтийн эзэмшлийн зам, талбайд стандарт эрүүл ахуйн шаардлага хангаагүй, чанарын баталгаагүй бараа бүтээгдэхүүн худалдаалах үйлчилгээ эрхлэгчдийг таслан зогсоох тухай дүүргийн Засаг даргын А/320 захирамж гарч байжээ. Тухайн үед энэ асуудлыг зогсоосон ч өнөөдөр энэ байдал үргэлжилсээр байна.

Эх сурвалж:www.polit.mn