Т.САЙХАН

Улаанбаатар хотын агаарын бохирдлын 1, 2-р бүсийн оршин суугчид орон сууцны ипотекийн зээлийн урьдчилгаа 30 хувийн төлбөрөө Гэр хорооллыг хөгжүүлэх сангаас төлүүлэх боломж бүрдсэн тухай Нийслэлийн Засаг дарга С.Батболд өнгөрсөн долоо хоногт зарласан. Энэ талаар нийслэлийн Засаг даргын ахлах зөвлөх Д.Мөнх-Эрдэнээс зарим зүйлийг тодрууллаа.

-Урьдчилгаа төлбөргүйгээр байртай болох хүсэлтэй иргэдийг бүртгэж эхэлсэн гэсэн. Энэ талаар тодруулахгүй юу?

-Зургадугаар сарын 30-ны өдрөөс иргэдийн өргөдлийг авч эхэллээ. Агаарын чанарыг сайжруулах 1, 2-р бүсийн оршин суугчид Нийслэлийн Гэр хорооллын дэд бүтцийн газарт очиж өргөдлөө өгөх боломжтой.  Бид энэ талаар журмаа боловсруулан ажлаа эхлээд байна.

-Иргэдээс авсан газрыг хэрхэн ашиглах вэ?

-Чөлөөлөгдөж байгаа газар дээр цэцэрлэг, сургууль, ногоон байгууламж, амрах тохилог орчин бүхий тоглоомын талбай барихаар төлөвлөж байгаа.  Төсөл сонгон шалгаруулах замаар хямд, чанартай орон сууц барина. Хотын төвөөсөө буюу төв зам, автобусны буудлаас хол зайтай амьдардаг айл өрхүүдийн газрын зах зээлийн үнэлгээ харьцангуй бага байдаг. Тэгэхээр энэ өрхүүд хэзээ гэр хорооллын дахин төлөвлөлтөд хамрагдана гээд хүлээж байх вэ. Гэр хороололд өвөл нь агаарын бохирдол, зун нь хөрсний бохирдол дээд цэгтээ хүрч тав тухтай амьдрах нөхцөл бололцоо жилийн дөрвөн улиралд байхгүй байна. Тиймээс хүсэлт гаргасан иргэдийг нэг ч гэсэн өдрийн өмнө тохилог орон сууцанд амьдрахад дэмжлэг үзүүлэх нь хотын удирдлагын зүгээс баримталж байгаа бодлого юм.

 Эх сурвалж:www.polit.mn