Б.ЗАЯА

Ерөнхийлөгчийн сонгуулийн дахин санал хураалтыг ирэх сарын 9-нд зохион байгуулахаар Сонгуулийн ерөнхий хорооноос зарлаад байсан. Энэ өдөр улсын хэмжээнд баяр, наадам эхлэх үе таарч байгаатай холбогдуулан зарим нам, хүчнээс эсэргүүцсэн байр суурийг илэрхийлж, тус хороонд шаардлага хүргээд байв. Үүний дагуу Сонгуулийн ерөнхий хороо өчигдөр хуралдаж дахин санал хураалтын товыг наашлуулж, ирэх сарын 7-нд болгохоор тогтжээ.

Засгийн газрын өчигдрийн хуралдаанаар Ерөнхийлөгчийн сонгуулийн дахин санал хураалттай холбогдуулан зарим аймгийн улсын баяр наадам зохион байгуулах хугацаанд өөрчлөлт оруулав. Тодруулбал, Баянхонгор аймгийн Баянхонгор сум байгуулагдсаны 60 жилийн ойг аймгийн ойтой нэгтгэж ирэх сарын 21-22-нд, зарим суманд шүлхий өвчин гарсан, нийт нутгаар нь гантай  байгааг харгалзан Дорноговь аймгийн наадмыг ирэх сарын 28-29-нд зохион байгуулах нь зүйтэй гэж үзжээ. Мөн зүүн бүсийн хурдан морины уралдаантай хамтатган Сүхбаатар аймгийн наадам ирэх сарын 28-29-нд болохоор тогтов.

Үүнээс гадна Ерөн­хий­лөгчийн сонгуулийн дахин санал хураалтын өдөр болох ирэх сарын 7-ны өдөр орон нутагтаа аймаг, сумын наадам хийхгүй байхыг Ерөнхий сайд Ж.Эрдэнэбат аймгуудын Засаг дарга нарт үүрэг болгожээ.

Эх сурвалж: “Зууны мэдээ” сонин