Ч.Зотол

“Шударга сонгуулийн төлөө иргэний нийгмийн хяналт сүлжээ” –ний гишүүн байгууллага Глоб интернэшнл төв Монгол Улсын Ерөнхийлөгчийн 2017 оны сонгуулийн телевизийн сурталчилгаанд мониторинг хийснээ танилцуулав. Судалгаанд МҮОНРТ, 25 дугаар суваг, TV-9, C1, UBS гэсэн таван телевизийг хамруулжээ. Тэднийг сонгож авахдаа Хэвлэлийн хүрээлэн, Максима компанийн 2016 оны судалгаанд суурилсан. Мөн олон нийтийн санхүүжилт ашигладаг, хамгийн хүртээмжтэй, орон даяар цацагддаг, агаарын долгион ашигладаг, үзэгчийн тоо, рейтинг, мэдээний хөтөлбөр, зах зээлд оршин тогтносон хугацаа, нэр дэвшигчийн хамаарал зэрэг шалгуурыг үндэслэсэн гэв.

Мониторингийг таван телевизийн 1691 цаг 13 минут, 42 секундын нэвтрүүлэгт хийснээс 135 цаг 54 минту, 10 секунд нь сонгуультай холбоотой мэдээлэл байжээ. Энэ нь нийт эфирийн 8.2 хувийг эзэлсэн байна. Сонгуулийн сурталчилгааны хугацаанд МҮОНРТ-ээр АН-аас нэр дэвшигч Х.Баттулгын талаарх мэдээлэл давамгайлсан нь 38 хувийг эзэлж, МАН-аас нэр дэвшигч М.Энхболд, МАХН-аас нэр дэвшигч С.Ганбаатарт ойролцоо цаг ногджээ. Арилжааны дөрвөн телевиз дунджаар хамгийн их цагийг МАН-аас нэр дэвшигч М.Энхболдод зарцуулсан бол АН-аас нэр дэвшигч Х.Баттулга 37 хувийг эзэлжээ. Харин МАХН-аас нэр дэвшигч С.Ганбаатарт хамгийн бага цаг ногдсон байна. Түүнчлэн хамгийн их эерэг өнгө аятай мэдээллийг UBS телевиз нэвтрүүлсэн бол хамгийн их сөрөг мэдээллийг С1 телевиз нэвтрүүлсэн нь 56 хувь болжээ. МАН, АН-ыгн нэр дэвшигчид өөрт ногдсон цагийг өрсөлдөгчдөө зориулсан нь хамгийн их байсан бол МАХН-аас нэр дэвшигч С.Ганбаатар өөрт ногдсон бүх цаг дээр зөвхөн өөрөө л гарсан гэсэн мониторинг гарчээ.

Эх сурвалж:www.polit.mn