МАХН-аас Ерөнхийлөгчийн сонгуульд нэр дэвшигч Сайнхүүгийн Ганбаатар анх удаагаа ард түмэнтэйгээ гэрээ байгууллаа. Энэ нь Монголын улстөрийн түүхэнд болж буй цоо шинэ соёл юм. Тэрээр гэрээндээ Монгол Улсын шинэ Үндсэн хуулийн төслийг нийт ард түмнээр хэлэлцүүлэн батлуулснаар Монголын ард түмэнд төр засгийн бүрэн эрхийг бүрмөсөн буцаан өгнө. Монголын ард түмэнд байгалийн баялагийг тэгш өмчлүүлнэ. Монгол Улсын иргэнийг төр засгийн хамгаалалтад авна. Хүний эрх, эрх чөлөөг найдвартай хангана” хэмээн эхний хэсэгт заажээ. Мөн энэхүү гэрээний хамгийн чухал хэсэг нь С.Ганбаатар дахин Ерөнхийлөгчид нэр дэвшихгүй гэдгээ мэдэгдсэн явдал байв. Тэрээ “Миний бие өндөр албан тушаалд очих гэж улайраагүй. Ард түмнийхээ эрх ашигт нийцсэн үйл хэрэг бүтээхийн тулд энэхүү сонгуульд нэр дэвшсэнээ үүгээр баталж байна. Өөрийн санасан ажлыг хийж бүтээж хэрэгжүүлэхэд дөрвөн жилийн хугацаа хангалттай хэмээн үзэж байна. Тиймээс Ерөнхийлөгчийн сонгуульд дахин нэр дэвшиж өрсөлдөхгүй гэдгээ ухамсартайгаар мэдэгдэж байна. Мөн миний гэр бүлийн гишүүдийн хэн нь ч авлига хээл хахуулийн асуудалд нэр холбогдохгүй гэдгээ хариуцлагатайгаар баталж байна. Хэрвээ би Ерөнхийлөгчөөр сонгогдсоныхоо дараа энэхүү гэрээг бүхэлд нь аль эсвэл нэг зүйлийг нь зөрчих аваас албан тушаалаасаа шууд огцорно” гэжээ. Энэхүү гэрээ нь Монголын улс төрийн түүхэнд хамгийн анхны тохиодол бөгөөд цаашид улс сайн жишгийг тогтоох үйл явдал боллоо хэмээн иргэд сонгогчид үзэж буй юм.

МАХН-ын сонгуулийн штаб