За сонгуультай зэрэгцээд нэг жаахан ухуулна явуулчихъя. Таргалалт, хөдөлгөөний хомсдолын талаар судалгаа хийгээд 6  жил болж байна. Ингээд хэлэхээр хүмүүс надаас  “за  турахын нууц юу байна, яаж хурдан турах вэ” гэж их асуудаг. Нууц гээд байх юм даанч алга даа. Турна гэдэг амьдралын хэв маяг дээр тогтсон их хэцүү үйл явц. Хамгийн чухал хоёр хүчин зүйл бол зөв хооллолт, хөдөлгөөн. Орчин цагт зөв хооллолт бас амархан зүйл биш. Бэлэнчилсэн, илчлэг өндөртэй хүнсний бүтээгдэхүүнүүд эргэн тойрноор дүүрэн. Тэр болгоноос зайлсхийх амархан биш. Дээрээс нь бидний амьдарч байгаа орчин хөдөлгөөнгүй амьдралын хэв маягийг дээр зэргээр бүрдүүлсэн гэх үү дээ. Гүнзгийрүүлэн яривал таргалалт гэдэг бол орчин үеийн хөгжил дэвшил болон биологийн хооронд үүсэж бүй зөрчилдөөний үр дагавар гэж үзэж болно. Бие организмын хувьсан өөрчлөлт нийгмийн хувьсалтай нийцэж чадахгүй, орчин бие хоёрын хооронд тэнцвэргүй үйлчлэл явагдаж байна гэж үзэж болно. Тэр утгаараа таргалалт зөвхөн ганцхан асуудал биш.

Хөдөлгөөний хомсдол, буруу хооллолт таргалуулаад зогсохгүй, эсийн хэмжээнд энергийн зарцуулалтын тогтворгүй байдлыг үүсгэдэг учраас даралт ихсэх, чихрийн шижин, зүрхний хэм алдах зэргийг багтаасан цогц синдром /metabolic  syndrome/ үүсэгдэг. Тийм учраас жин дээр хэмжигдэх тоон хэмжүүр бол гол асуудал биш. Илүүдэл жинтэй, даралт ихтэй, цусан дах сахарын хэмжээ их гарсан гэх клиентүүдэд би тур гэж зөвлөх дургүй. Зөвхөн амьдралын хэв маягаа өөрчил л гэж хэлдэг. Янз бүрийн хэтэрхий туйлширсан хоолны дэглэм бариад, эсвэл эм нэмэлт бүтээгдэхүүн хэрэглээд жин хасах амархан боловч, хэзээ ч насны шийдэл биш. Зөв амьдралын хэв маягтай эрүүл байхад илүү жинтэй, том харагдах нь асуудал биш. Тийм хүмүүс ч зөндөө байдаг.

Докторант  З.Баттогтох

Эх сурвалж: www.polit.mn