С.САРУУЛ
Үндэсний томоохон үйлдвэрлэгч “Говь” компанид өчигдөр /2017.06.14/ гал гарч 20.40 цагаас хойш өнөөдөр өглөөний 09:00 цаг хүртэл ажиллаж галын тархалтыг зогсоосон юм. Энэ талаар Шадар сайд шуурхай мэдээлэл сонсч ОБЕГ-ын Гал түймэртэй тэмцэх газрын дарга С.Залуухүү галын нөхцөл байдлын талаар мэдээлэл өгөв. Тэрээр “Гал унтраах машиныг сэлгэн байрлууллах нөхцөл хязгаарлагдмал.Гал эрчимтэй тархсан. Олон давхарласан хар цаасанд задаргаа хийхэд хүндрэлтэй, хорт утаа ихтэй байсан нь хүндрэл учруулсан. Барилгын дээврийн талбай болох 30 мянган м.кв талбай нэлэнхүйдээ хавж доогуур шатсан. Штабын удирдах бүрэлдэхүүн хуралдаж барилгын үндсэн хийц, тоног төхөөрөмжийг аврах чиглэлд ажилласан. Тиймээс барилгын дээврээс өөр хэсэг галд өртөөгүй. Барилгын үндсэн хийц дээр 40 орчим метр зузаан модон хийцээр өндөрлөж их хэмжээний дулаалга хөөсөн хөвөн давхарласан нь гал хурдтай тархсан” гэлээ. 
Галын дуудлагын дагуу Нийслэлийн Онцгой байдлын газрын бүх Гал түймэр унтраах, аврах анги болох 13 ангийн ээлжийн 140 орчим албан хаагч, гал унтраах шуурхай албаны 30 гаруй автомашиныг дайчлан ажилласан байна. Мөн Ус сувгийн удирдах газар болон хот тохижилтын ус түгээх цистерн автомашинуудыг дайчилжээ. 
Хүн бэртэж гэмтээгүй бөгөөд галын шалтгаан, хохирлын хэмжээ тогтоогдоогүй байгаа юм. 

Эх сурвалж: www.polit.mn