С.САРУУЛ

Үндэсний томоохон үйлдвэрлэгч Хан-Уул дүүргийн 3 хороонд байрлах “Говь” компанид өчигдөр /2017.06.14/ гал гарч 20.45 цагийн орчимд онцгой байдлын байгууллагад дуудлага иржээ. Галын тархалт хүчтэй байсан учраас нийслэлийн бүх гал түймэр унтраах, аврах ангийн бүрэлдэхүүн ажиллаж шуурхай арга хэмжээ авч ажиллаж байна.

Галын дуудлагын дагуу Нийслэлийн Онцгой байдлын газрын бүх Гал түймэр унтраах, аврах анги болох 13 ангийн ээлжийн 150 орчим албан хаагч, гал унтраах шуурхай албаны 30 гаруй автомашиныг дайчлан ажилласан байна. Мөн Ус сувгийн удирдах газар болон хот тохижилтын ус түгээх цистерн автомашинуудыг дайчилжээ.
ОБЕГ-ын тэргүүн дэд дарга, бригадын генерал Г.Ариунбуян, Гал түймэртэй тэмцэх газрын дарга, хурандаа С.Залуухүү нар албан хаагчдыг ахалжээ.

Албаны эх сурвалжийн хэлснээр барилгын үндсэн дээвэр дээр мод болон хэдэн давхар хар цаас, шилэн хөвөнгөөр зузаалга хийсэн нь галын тархалтыг улам нэмэгдүүлсэн гэнэ. Онцгой байдлын албан хаагчид "Говь" компанид гарсан галын тархалтыг зогсоохоор тасралтгүй арав гаруй цаг ажиллаж байгаа ч одоог хүртэл бүрэн унтраагүй гэсэн мэдээллийг НОБГ-аас өглөө. /2017.06.15 08:00 цаг/. Албан бус мэдээллээр онцгой байдлын албан хаагчид болон үйлдвэрийн ажилчид үйлдвэрийн тоног төхөөрөмжийг нүүлгэж чадсан гэх мэдээлэл бий. Азаар хүн бэртэж гэмтээгүй байна.

Эх сурвалж: www.polit.mn