Б.ЭНХ

2017 JCI ASPAC чуулган гурав дахь өдрөө амжилттай үргэлжилж байна. JCI байгууллагын Ази-Номхон далайн бүсийн чуулганд 51 орны 3500 гаруй бизнесмен, манлайлагч залуус хүрэлцэн ирсэн билээ. Чуулганы энэ өдрүүдэд нэгэн зэрэг олон арга хэмжээ болж буй. Өнөөдөр JCI Ази-Номхон далайн бүсийн чуулганы гишүүн орнуудын төлөөллийн Нэгдсэн чуулганы II үе үргэлжилснээс гадна олон төрлийн сургалт боллоо. JCI байгууллагын үндсэн зорилтуудын нэг гишүүдийнхээ хувь хүний хөгжил рүү чиглэсэн үйл ажиллагаанд анхаарлаа хандуулж, залуусын манлайллыг бий болгох олон төрлийн сургалтыг дэлхий нийтээр зохион байгуулдаг юм. Тэгвэл энэ удаа Монголд зохион байгуулж буй чуулганы үеэр 27 төрлийн сургалтыг  зохион байгуулж байна. Сургалтын үйл ажиллагаа өнөөдөр “Үр ашигтай харилцаа: Санаагаа зөв илэрхийлэх”, “Үр ашигтай манлайлал”, “Төслийн менежмент”, “Урам зоригтой манлайлал: Захиргаадалт хэрэглэхгүйгээр үр дүнд хүрэх нь” зэрэг дөрвөн төрлийн сургалтыг “Улаанбаатар” зочид буудалд зохион байгуулав. “Урам зоригтой манлайлал: Захиргаадалт хэрэглэхгүйгээр үр дүнд хүрэх нь” сургалтыг Монгол гишүүн буюу JCI Монгол байгууллагын гишүүн Э.Чинзориг  Дэлхийн 51 орны гишүүдэд заасан нь бидний нэгэн бахархал байлаа.

Түүнчлэн JCI байгууллагын Мэтгэлцээний тэмцээн мөн өнөөдөр эхэллээ. Энэхүү тэмцээн нь англи хэл дээр зохион байгуулагддаг бөгөөд Дэлхийн олон орны гишүүд глобал сэдвийн хүрээнд өөр хоорондоо өрсөлдөж байна. Тэмцээнд Монгол Улсыг төлөөлөн JCI Монгол байгууллагын баг оролцож байна. Шилдэг оролцогчдыг маргааш чуулганы хаалтын үйл ажиллагааны үеэр тодруулан шагнал гардуулах ажээ.

Дашрамд дурдахад, JCI байгууллагын Ази-Номхон далайн бүсийн чуулганыг Монгол Улсад зохион байгуулах эрхийг JCI Монгол байгууллага хоёр жилийн өмнө авч, бэлтгэл ажилдаа орсон байсан билээ. Чуулганы өдрүүдийн тайлангаар ирсэн гадны зочид чуулганы зохион байгуулалтад ам сайтай байна.

Эх сурвалж: www.polit.mn