Н.ДОЛЖИНЖАВ

Төрөлхийн дөрвөн мөчний дутуу хөгжилтэй бяцхан охин Х.Буянжаргалд туслах “Нэг бал 1000 төгрөг” сайн үйлсийн аян өрнөөд багагүй хугацаа өнгөрсөн билээ. Мөн аяны хүрээнд үндэсний үйлдвэрлэгч компаниуд болон Өвөрмонголын иргэд хандив өгсөн байна. Охиныг Монголд эмчлэх боломжгүй учир БНСУ-д 150-200 орчим сая төгрөгөөр эмчлүүлэхээр болсон боловч хандивын хүрээнд цуглуулсан орлого охиныг эмчлүүлэхэд хүрэлцэхгүй байгаа аж. Охины эцэг, эх санал тавьсны дагуу “Эрдэнэзуу” хийдийн хамба лам Х.Баасансүрэн “Бусдын төлөө гэрэлтье” ухаарахуй лекцийг энэ сарын 16-нд МҮЭСТӨ-д зохион байгуулахаар болсон байна. Хандивын арга хэмжээний талаар охины ээж Ч.Уранцэцэгээс тодрууллаа.

-Лекцний орлогын хэдэн хувь нь охины эмчилгээний зардалд хандивлагдах вэ?

 - “Бусдын төлөө гэрэлтье” ухаарахуй лекцийн бүх орлого эмчилгээний зардалд хандивлагдана.

-Лекцэд ямар  уран бүтээлчид хүрэлцэн ирэх вэ?

 -Соёлын тэргүүний ажилтан, дуучин Л.Банзрагч, О.Баянмөнх, Л.Нарантуяа, Э.Чулуунчимэг, Н.Мөнгөншагай, Б.Энхбат,   яруу найрагч Б.Болорцэрэн  нарын   уран бүтээлчид оролцоно.  

Дөнгөж ой  өнгөрч байгаа ч тэнцвэрийн эрхтэн байхгүйн улмаас хөлд орж, алхаж чадахгүй байгаа бяцхан охиныг ирэх  наймдугаар  сард  яаралтай эмчлүүлэх шаардлагатай.  Тиймээс  түүнд халуун гараа сунган хандивын арга хэмжээнд хандив өргөхөөс гадна, сонирхолтой лекц, ая дуу сонсохыг элэг нэгт монголчууддаа уриалж байна. Сайн үйлс дэлгэрэх болтугай.

Хандивын данс:  ХААН БАНК: 5166258376 

                           ГОЛОМТ БАНК: 1605118915