С.САРУУЛ

Допингийн үндэсний төвөөс улсын начин Б.Ганзориг, улсын начин Б.Баатарцол нарыг хориотой эмийн жагсаалтад багтах бодис хэрэглэсэн хэмээн мэдэгдсэн. Энэ дугаар Үндэсний баяр наадмыг зохион байгуулах комиссоос энэ оны хоёрдугаар сард улсын начин Б.Ганзоригийн цолыг хураах, Улсын начин Б.Баатарцолын барилдах эрхийг нэг жилээр хасах шийдвэрийг гаргасан байдаг.

Тэгвэл дээрх шийдвэрийг хууль бус хэмээн үзэж Улсын начин Б.Ганзориг хуулийн байгууллагад хандсан байна. Энэ оны хоёрдугаар сарын 20-нд Нийслэлийн захиргааны хэргийн анхан шатны шүүхэд нэхэмжлэл гаргасан бөгөөд шүүхээс Үндэсний баяр наадмын комиссын шийдвэрийг түдгэлзүүлэх шүүгчийн захирамж гарчээ. Мөн Захиргааны хэргийн давж заалдах шатны шүүхээр дээрх шүүгчийн захирамжийг хэвээр үлдээжээ.

Ингэснээр Б.Ганзориг улсын начин цолтойгоо барилдах боломжтой болж байгаа бөгөөд эцсийн шийдвэрийг энэ сарын 12-нд шүүхээс гаргах юм байна.

Б.Ганзоригийн эрхийг сэргээсэн бичгийг Нийслэлийн шүүхийн шийдвэр гүйцэтгэх албанаас Үндэсний баяр наадмыг зохион байгуулах хороо болон Үндэсний Бөхийн холбоо руу хүргүүлсэн байна.

Эх сурвалж: www.polit.mn