Т.САЙХАН

Энэ жил Төв талбай амрах завгүй байна. Учир нь Төрийн байгууллагууд ээлжлэн өдөр өнжилгүй нээлттэй ажиллаж байгаа.    Дөрөвдүгээр сарын 21-нээс эхэлсэн нээлттэй хаалганы өдрүүд үргэлжилсээр.  Өнөөдөр /06.07/ Сангийн яам, энэ сарын 09,10-нд ХХААХҮЯ, 12,13-нд Эрчим хүчний яам, 14,15-нд УУЯ, 16,17-нд БХБЯ  19,20-нд ХНХЯ нээлттэй ажиллах хуваарьтай байна.  Уг нь бол шинэ парламент бүрдсэн анхны хавар байлаа. Ажлаа авсны дараагаар уул уурхай, санхүү, мөнгөний хямрал тойрсон маргаантай асуудал ч олон байв.  ОУВС-д хамрагдах нь зөв, буруу, цалин тэтгэвэр нэмэхгүй, харин эсрэгээрээ олон төрлийн татвар нэмэх, тэтгэврийн насыг уртасгах, оффшор бүсэд нуусан хөрөнгө гээд л ард түмэн, иргэний нийгмийн байгууллагуудын үзэл бодлоо илэрхийлэх, эсэргүүцэх асуудлууд олон байсан. Гэхдээ иргэд энэ бүхэнд үзэл бодлоо илэрхийлж чадсангүй. Тэдний үгээ хэлэх, үзэл бодлоо  илэрхийлэх эрхийг улстөрчид Нээлттэй хаалганы өдөр гэх цэвэрхэн аргаар боожилж орхилоо. Учир нь иргэдийн дуу хоолойгоо хүргэдэг хамгийн том индэр бол Төв талбай.  Тэнд нь өдөр бүр “Нээлттэй хаалганы өдөр” зохион байгуулж, жагсаал цуглаан зохион байгуулах зөвшөөрлийг  хэнд ч өгсөнгүй. Харин ч үзэл бодлоо илэрхийлэх гэсэн нэгнийг баривчилж байцааж, эрүүгийн хэрэг хүртэл тулгах боллоо.   Ингэснээрээ иргэдэд үзэл бодлоо илэрхийлбэл ийм байдалд  хүрнэ шүү гэж айлгах мэссежийг цаагуураа өгч байна.   Мөн Монгол Улс тав дахь Ерөнхийлөгчөө сонгох хариуцлагатай цаг үед ирээд байна. Сонгуулийн жил, сонгуулийн өмнөх өдрүүд нэлээд хөдөлгөөнтэй байдаг. Харин энэ жил хаа хаанаа хүлцэнгүй, ард иргэд ч даруухан байна.  Тэднийг Нээлттэй хаалганы өдрүүдээр дарж, дарамталж чадлаа л гэж харж байна. Сонгуулийн өмнөх энэ олон нээлттэй хаалганы өдрүүд сонгуулийн дараа хэрхэн үргэлжлэх бол доо.  Төрийн байгууллагууд Төв талбайг орхиод хаалттай ажиллаж эхэлнэ.  Улс төрчдийн сонгуулийн өмнө иргэдийн үзэл бодлоо илэрхийлэх эрхийг боомилсон “Нээлттэй хаалганы өдөр”-үүд ажиллагаа амжилттай болж байна даа. Сонгодог арга  байлаа.  Үүнийг бодож олсон улстөрийн  менежер хол явах нь тодорхой.

Эх сурвалж:www.polit.mn