Т.ДАЛАЙ

Хараагүй хүүхдийн тусгай сургалттай 116 дугаар сургуулийн 7-12 дугаар ангийн зургаан сурагч өнөөдөр /06.05/ хичээл хаялт зарлалаа. Сурагчид өмнө нь “Багш нар ёсзүйгүй байна, бид нарт хичээл хангалтгүй зааж байна, багш нар өөрсдөө “баррел” үсгээ мэдэхгүй байна, хичээл зааж байгаа багш нараа чадавхжуулах хэрэгтэй байна” гэх зэргээр сургуулийн удирдлагад шаардлага хүргүүлж буйгаа илэрхийлж байсан юм. Харин өнөөдөр /06.05/ тэдний шаардлагыг тоохгүй, хүлээж авахгүй байна хэмээн тэд ийнхүү дахин хичээл хаяж байгаа аж.

116-р сургуулийн аравдугаар ангийн сурагч А.Сайханцэцэг хэлэхдээ “Багш болон захирал удирдлага хүүхдүүдийнхээ үзэл бодлыг сонсдоггүй. Бид өмнө нь хичээл хаялт зарлахдаа сургуулийн захиргаанд шаардлага хүргүүлэхэд тавдугаар сарын 17-нд хариу өгнө гэсэн боловч биелүүлсэнгүй. Иймд бид шаардлагынхаа хариуг авахаар дахин хичээл хаялт зарлаж байна. Бид ур чадвар муутай багш нараар хичээл заалгах хүсэлгүй байгаагаа илэрхийлж, багш нарынхаа ур чадварыг сайжруулах хүсэлтийг БСШУСЯ болон Хараагүйчүүдийн үндэсний холбоонд явуулсан. Тодорхой хариу ирээгүй тул бид өнөөдөр хэний ч шахалтаар биш өөрсдийн хүсэлтээр хичээл хаялтыг зарлаж байна” гэв.

Эх сурвалж:www.polit.mn