Т.ДАЛАЙ

Нийслэлийн Аялал жуулчлалын газар БНСУ-ын Чежү хотын Аялал жуулчлалын газар хамтран Улаанбаатарт явган аялалын маршрутыг нээх гэж байна.  Олле стандартын дагуу явган аяллын чиглэл тогтоон, тэмдэгжүүлэх ажлыг нэг жилийн хугацаанд гүйцэтгэжээ.  Горхи Тэрэлжийн байгалийн цогцолборт газар, Богд уулын дархан цаазат газарт тус бүр нэг нэг чиглэлийг тогтоож, 2017 оны тавдугаар сарын 20-оос зам дагуу тэмдэг, тэмдэглэгээ байрлуулах ажлыг эхлүүлсэн байна. Ингээд Монгол олле явган аяллын чиглэлийг энэ сарын 18, 19-нд нээснээр хүмүүс алхах боломжтой болох аж. Олле гэдэг нь Чежүгийн эртний аялгаар “гудамж талбайгаас гэрийн хашаа хүртэлх нарийхан зам” гэсэн утгатай үг бөгөөд БНСУ-д 2006 оноос хойш Чежү арлыг тойрсон 26 курс, 425 км явган аяллын чиглэлийг тэмдэгжүүлсэн байдаг аж. Олле явган аяллын чиглэл нь Солонгос улсад хурдан хугацаанд хөгжиж, олон хүний алхах дуртай зам болсон бөгөөд зам дагуух тэмдэг, тэмдэглэгээ нь байгаль орчинд сөрөг нөлөөгүй материалуудаар хийгддэг. Уг арга хэмжээ өмнө нь Япон улсад нээгдсэн бөгөөд Монгол Улс олле явган аяллын стандартын замтай гурав дахь орон болж байна.

Эх сурвалж:  www.polit.mn