Т.САЙХАН

УИХ-ын гишүүн С.Жавхлан Төрийн ордон дахь өрөөндөө гурав дахь өдрөө хонож байна. УИХ-д суудалтай намын бүлгүүд болон УИХ-ын даргад шаардлага хүргүүлсэн бөгөөд хариуг өгтөл УИХ-ын чуулган болон байнгын хорооны хуралдаанд суухгүй гэдгээ мэдэгдэж ажил хаялт зарласан. Гэвч түүнийг ажлаа тасласан гэх мэдээллийг албанаас өгч байгаа учраас Төрийн ордны өрөөндөө хонож, тэмцлээ үргэлжлүүлж байгаа юм байна. Тэрээр “Гадаадад мөнгө угааж, тэнд данстай байгаа гишүүдийнхээ нэрийг зарлаад, тэр хүмүүсээ намаас нь болон Их хурлын гишүүнээсээ татах, ингэсэн цагт намууд Ерөнхийлөгчийн сонгуульд нэрээ дэвшүүл гэдэг шаардлага тавьсан. Би ажил дээрээ ирэхгүй байж үзлээ, ирээд хонож үзлээ. Цаашид яах ёстой вэ. Миний арга дусахгүй. Би ямарваа нэгэн юмыг горьдож байгаа юм биш, шаардаж байгаа юм. Жавхланг хараарай. Би Монголыг заавал гоё болгоно. Өнөөдөр нохой мэт үзэж байж болно. Түмэн олны дэмжлэг их байна. Монголоо цэвэрлэж авахын тулд хүн бүр өөрийн биеэр, бодит үйлдэл үзүүлэх хэрэгтэй байна. Бид нар хамтарч асар өргөн хүрээтэй давалгаа үүсгэмээр байна. Дэмжиж байгаа нэрээр сэтгэгдэл бичээд суугаад байвал байдал өөрчлөгдөхгүй шүү. Би Ерөнхийлөгчийн ээлжит сонгуулийг цуцлах хэмжээний тэмцлийг хийнэ” гэлээ.

Эх сурвалж:www.polit.mn