Т.САЙХАН

БСШУС-ын сайд Ж.Батсуурийг үүрэгт ажлаас нь огцруулах тухай саналыг УИХ-ын дарга М.Энхболдод Ерөнхий сайд Ж.Эрдэнэбат өчигдөр /05.30/ өргөн мэдүүллээ. Саяхан математикийн улсын шалгалтын материал задарч, энэ салбарт өмнө нь болж байгаагүй хариуцлагагүй үйл  явдал болсон хэмээн тодотгожээ.  Мөн тусгай сургууль дээр болсон явдлууд, Ж.Батсуурь сайдын зарим мэдэгдэл гээд ер нь энэ салбарт хэл ам нэлээд их байсан.  Харин Ерөнхийлөгчийн сонгуулийн өмнө, Хүүхдийн баярын өдрүүдэд огцруулах асуудлыг гаргаж ирсэн нь анхаарал татаж байна.  Өчигдөр орой /05.30/ Ерөнхий сайд Ж.Эрдэнэбат огцруулах хүсэлтээ хүргүүлсэн бол түүний дараа МАН-ын удирдах зөвлөл хуралджээ.  Хурлаар боловсролын салбарын удирдлагын асуудлыг ярилцсан талаар эх сурвалж мэдээллэсэн. Яамны дэд сайд Ё.Отгонбаяр мөн АНУ-д ажиллах Элчин сайдаар томилогдоод байгаа.  Энэ суудлыг намынхаа Хэвлэл мэдээлэл олон нийттэй харьцах хэлтсийн дарга Б.Ганбаярт өгөх талаар яриа байсан ч намын зүгээс үгүйсгэсэн.   Тэгэхээр хэн хэнийг энэ салбарт хуваариалахаа ярилцаж, ямар нэгэн шийдэлд хүрч амжаагүй хурал өндөрлөжээ.  Гэхдээ  Боловсролын сайдад дөрвөн хүний нэр яригдсан байна.  УИХ-ын гишүүн Л.Цогзолмаа, Л.Оюун-Эрдэнэ, Ц.Даваасүрэн, О.Содбилэг нарын нэг энэ суудалд суух бололтой.   Харин  дэд сайдын асуудлыг одоогоор яриагүй байна.  Үүнээс үзэхэд сайдын асуудал чуулганы хуралдаанаар орж эцэслээгүй байхад намын удирдлагууд дараагийн хүнийг ярьж эхэлсэн нь С.Батсуурь сайд ажлаа өгөх нь тодорхой болсныг баталж байна.  

Эх сурвалж:www.polit.mn