Т.ДАЛАЙ

Төвбанкны өмнөх удирдлагуудад хариуцлага тооцох асуудал Ерөнхийлөгчийн сонгуультай зэрэгцэн гарч ирлээ.  Өнгөрсөн долоо хоногт Т.Аюурсайхан нарын гишүүд Монголбанкны шалгалтын дүгнэлтийг Байнгын хороон дээр олон нийтэд мэдээлсэн.  Монголбанк өнгөрсөн жилүүдэд үнэ тогтворжуулах, “Сайн” хөтөлбөрүүд, АСЕМ-ын санхүүжилт зэрэг арга хэмжээнд зориулж зээл олгохдоо хууль зөрчин бодлогын хүүгийн төвшнөөс хэт бага хэмжээнд зээлийн хүүг тогтоож, зах зээлд их хэмжээний мөнгө нийлүүлсний улмаас төгрөгийн худалдан авах чадвар огцом доройтож, банкны алдагдал өссөн. 2011 онд Монголбанк 179 тэрбум төгрөгийн ашигтай ажиллаж байсан бол 2012 оноос алдагдалтай ажиллах болсон. 2016 оны эцэс гэхэд хүүгийн, санхүүгийн үүсмэл хэрэгслийн буюу своп, форвард хэлцэл, гадаад валют арилжааны болон бусад хүчин зүйлсийн нөлөөнөөс болж Монголбанкны хуримтлагдсан алдагдал гурван их наяд 19 тэрбум 300 сая төгрөг болжээ.  Үүний хариуцлагыг байнгын хорооны гишүүд өмнө удирдлагуудад хүлээлгэх ёстой гэв.  Энэ үеэр “Монголбанкны ерөнхийлөгч асан Н.Золжаргал хаана яваа” талаар асуудал гарсан.  Гэвч яг тодорхой хариултыг хэн ч өгсөнгүй.  Албан бус эх сурвалжийн мэдээлснээр Н.Золжаргал одоогоор эх орондоо байхгүй байгаа бололтой.  Ямартай ч байнгын хороодын гишүүдийн хэлж буйгаар Монголбанкны экс ерөнхийлөгч хариуцлага хүлээх нь л юм байна.  

Эх сурвалж: www.polit.mn