Монгол Улсын Шадар сайд У.Хүрэлсүх тэргүүтэй төлөөлөгчид Гамшгийн эрсдэлийг бууруулах дэлхийн хөтөлбөрийн V чуулганд оролцож буй билээ. Мексикийн Холбооны Улсын Канкун хотноо зохион байгуулагдаж буй тус чуулганд улс орнуудын засгийн газрын тэргүүн, сайд, парламентын гишүүд, НҮБ-ын дээд төвшний удирдлага болон эрдэм шинжилгээний байгууллага, иргэний нийгэм, залуучуудын байгууллагын 5000 гаруй төлөөлөгч оролцож байна.

Дэлхийн улс орнууд Гамшгийн асуудлаа нэгдсэн байдлаар зөвлөлдөхөөр цугласан энэхүү чуулганы үеэр Монгол Улсын Шадар сайд ноён У.Хүрэлсүхэд НҮБ-ын “Манлайлагч-Төрийн түшээ”  өргөмжлөлийг хүртээсэн байна. Уг нэр хүндтэй өргөмжлөлийг Монгол Улсын Шадар сайд ноён У.Хүрэлсүх, Мексикийн Холбооны Улсын Ерөнхийлөгч ноён Энрик Пена Нието хүртчээ.

Шадар сайд У.Хүрэлсүх  Гамшгийн эрсдлийг бууруулах НҮБ-ын  “Манлайлагч төрийн түшээ”-ээр өргөмжлөгдсөнөөр Монгол Улс болон Азийн бүс нутгийн хэмжээнд гамшгийн эрсдэлийг бууруулах бодлого тодорхойлоход манлайлах үүрэгтэйгээр оролцохоор  хүлээн зөвшөөрөгдсөний илэрхийлэл гэдгийг албаныхан онцолж байна.

Энэ удаа Монгол Улсын Шадар сайдад уг хүндэт өргөмжлөлийг өгөх болсон шалтгаанаа зохиoн байгуулагчдын зүгээс Ноён У.Хүрэлсүх нь “Өөрийн эх орондоо гамшгаас хамгаалах, гамшгийн эрсдэлийг бууруулахад маш сайн ажиллаж чадсан. Мөн төр засгийн шийдвэрийг гамшгаас хамгаалах чиглэлд хандуулж Гамшгийг эсрэг хуулийг батлуулсан, Олон Улсын байгууллага болон дэлхийн бусад улсуудтай нягт хамтарч ажиллаж үр дүнд хүрсэн, түүний удирдах чадвар, арга барил, ажлын туршлагыг дэлхийн бусад улс орны шийдвэр гаргах түвшний хүмүүс хуваалцах нь зүйтэй” хэмээн онцолсон байна.

Гамшгийн эрсдэлийг бууруулах дэлхийн хөтөлбөрийн тавдугаар чуулган нь улс орон, байгууллага, салбаруудын хооронд харилцан уялдааг сайжруулах, гамшгийн эрсдэлийг бууруулахад гарсан тэргүүн туршлага, мэдлэг, мэдээллийг солилцох зорилгоор Нэгдсэн Үндэстний Байгууллагын Гамшгийн эрсдэлийг бууруулах газраас хоёр жилд нэг удаа зохион байгуулдаг чуулга уулзалт юм гэж Шадар сайдын ажлын албанаас мэдээлэв.