Ч.БҮЖИН

Урин дулаан цаг  хаяанд ирж зуслангийн зугаатай өдрүүд эхлэж байна.   Нийслэлд үйл ажиллагаа явуулдаг 24 зуслан ирэх сарын 10-наас хүүхдүүдээ хүлээн авахаар болжээ. Энэ жил гурван зуслан нэмэгдэж үйл ажиллагааг эхлүүлэхээр болжээ. Тиймээс нэмэгдэж буй зуслангуудын талаар мэдээлэл хүргэж байна.  

Ажил хөдөлмөрийн үр шимийг ойлгуулах “Хөдөлмөр” зуслан

“Хөдөлмөр” зуслан нь Төв аймгийн Баянчандмань сумын Доргонотын ам хэмээх газарт байрлах бөгөөд, хотоос 75 км-ын зайтай оршино. Тог цахилгаангүй, утасны сүлжээ барихгүй, морин тэргээр усаа зөөх гэх мэт нөхцлийг зориуд бүрдүүлсэн нь тэдэнд ажил хөдөлмөрийн үнэ цэнийг ойлгуулах, байгаль орчноо хайрлан хамгаалах, мөн бие дааж амьдрах чадвар нь нэмэгдэх зэрэг сурагчийн хүмүүжил төлөвшилтөд өндөр ач холбогдолтой юм.  Зусланд амрах нь манай сургуулийн сургалтын чухал хөтөлбөрүүдийн нэг юм. Хичээл бол эрдэм мэдлэгт суралцах үйл ажиллагааг голчилдог, дугуйлан секц нь авьяас чадварыг нээн хөгжүүлэхийг чухалчилдаг бол зуслангийн хөтөлбөр нь сурагчдад мал аж ахуй, газар тариалан зэрэг хөдөө аж ахуйн орчин нөхцөлд амарч ажиллах замаар ажлын эв дүй, тэсвэр хатуужил суулгах, бие даан ажиллаж амьдрах чадварт суралцуулах зорилготой. Хөдөлмөр зусланд сурагчдын зуны амралтын хугацаанд 6-12-р ангийн сурагчид хамрагдах бөгөөд нэг ээлжинд 40 хүртэлх хүүхэд 5-10 хоногийн хугацаатай амарна.

Зөвхөн улаан загалмайчуудад зориулжээ

МУЗН-ийн гишүүн хүүхэд, багачуудыг амраах, сургалт, судалгаа явуулах байраар хангах “Хүүхэд, залуучуудын хөгжлийн төв зуслан”-г Цонжинболдогт байгуулжээ.  Энэхүү зуслан нь зөвхөн улаан загалмайн нийгэмлэгийн хүүхэд залуучуудад зориулагдсан сургалт сурталчлах үйл ажиллагаа явуулдаг онцлогтой юм.

“Нарны хүүхдүүд” зуслан

Тус зуслан нь Улаан чулуутын хогийн цэг дээр амьдардаг хүүхдүүдийн нийгмийн хөгжлийг ханган ажиллах зорилготой. Канад улсаас санхүүжин үйл ажиллагаагаа явуулж эхлээд юм байна.  Өмнө нь Улаан чулуутын хогийн цэг дээр амьдардаг хүүхдүүдэд зориулсан “Нарны хүүхдүүд” цэцэрлэг үйл ажиллагаагаа эхлүүлж байв.  Энэ нь энэ жилээс зуслан болон өргөжиж буй юм.

Эх сурвалж:www.polit.mn