Ч.БҮЖИН

Аялал жуулчлалын улирал эхэлж байна. Монгол улс бол адал явдалт аяллын орон.  Тэр ч утгаараа жуулчдын сонирхлыг ихэд татдаг. Энэ салбараас эдийн засгийн хувьд мөнгө босгох боломж бий хэмээн ярьдаг.  Бид аялал жуулчлалын салбарын хамгийн эхний нэгж болох бэлэг дурсгалын дэлгүүрүүдээр орлоо.  Сүүлийн жилүүдэд манай улсад жижиг дунд үйлдвэрлэл ихэд хөгжиж байна.   Сонирхол татахуйц, монголын зан заншлийг шингээсэн жижиг бүтээгдэхүүнүүд дэлгүүрийн лангуугаар дүүрэн байв. Тэднээс онцлон зарим шинэ бэлэг дурсгалын зүйлсийг танилцууъя.

Чонын соёо, шагай

Монголчууд эрт дээр үеэс ан амьтныхаа арьс, үс, ясыг янз бүрийн байдлаар бүтээгдэхүүн болгон хэрэглэж ирсэн.  Түүний нэг нь чонын шагай юм. Сүүлийн үед үүнийг бэлэг дурсгалын зүйлд их ашиглаж байна. Мөнгөөр бөгжлөн түлхүүрийн оосор, зүүлт зэргийг хийжээ. Түүнийг жуулчид таван ам.доллараар худалдан авах боломжтой байна. 

Эсгий эдлэлүүд

Сүүлийн үед гар урчууд эсгийгээр янз бүрийн бүтээгдэхүүн хийж байна.  Цүнх малгай зэргээс эхлээд жижиг бэлэг дурсгал бий. Монголын орны газрын зураг, монгол гэр, тэмээ гээд бүгдээрээ эсгий.  Үүнийг хоёр ам.доллараар худалдан авах боломжтой юм.

Хөргөгчний соронз

Чингис хааныг дэлхийн талыг эзэлж явсан аугаа удирдагч, баатар гэдгээр нь дэлхий нийт мэднэ. Тэр ч утгаараа Чингисийн зурагтай бэлгийг гадныхан ихэвчлэн авдаг. Энэхүү  хөргөгчний соронзийг таван ам.доллараар авах боломжтой.

Угсармал гэр

Монгол гэр 3000 орчим жилийн тэртээгээс одоогийн хэв шинж нь бүрэлдэн, хүний бидний амьдралын гол хэрэгцээ болсоор өнөө цагт иржээ. Нүүдэллэн аж төрөхөд хамгийн тохиромжтой. Сүүлийн үед гэрийг жижигрүүлсэн хувилбараар танин мэдэхүйн ач холбогдолтойгоор худалдаалах нь олон болжээ.  Гэр сууц нь бүтэц зохиомжийнхоо хувьд ихээхэн сонирхол татдаг билээ. Энэхүү гэр нь 1.5 ам.доллароор худалдаалагддаг байна.

Тоонот цаг

Монголд жилийн 300 орчим өдөр нь нартай байдгаас намар, өвөл, хаврын хүйтэнд тооноор орж байгаа нарны илч нь гэрийг дулаацуулах ач холбогдолтой. Монголчууд эрт дээр үеэс тооноор туссан нарны байдлаар өдрийн цагийг тодорхойлдог байжээ. Үүнийг бэлэгдсэн уг цагийг хоёр ам.доллараар авах боломжтой.

Монгол эмээл

Монгол ахуй,  соёлын илэрхийлэл бол малчин ард түмэн. Тэдний адуу малдаа хэрэглэдэг эд бүтээгдэхүүнүүд ямагт сайн сайхныг урин дууддаг хэмээн бэлэгддэг.  Түүний нэг нь яалт ч үгүй Монгол адууны эмээл хазаар ногт зэрэг бүрэн хэрэглэл юм.  Энэхүү жижиг эмээлийн сувинерийг дунджаар таван ам.доллараар худалдан авах боломжтой.

Эвэр эдлэлүүд

Гар урчууд маань таван хошуу малын эврээр янз бүрийн бэлэг дурсгалын зүйлс хийжээ. Аяга, хундага, үзэгний сав зэргийг харж болно.  Эвэрт аягануудыг 15 ам.доллараар худалдан авах боломжтой байна.

Модон эдлэл бэлэг дурсгалын зүйлс дунд онцгой байр суурь эзэлдэг.  Модоор монголын зан заншил аж амьдралыг харуулсан өгүүлэмжтэй олон бүтээгдэхүүн бий. Монгол гэр, хоёр бөхт тэмээ, хүү гэдэг таван ам. доллараар худалдаалагдаж байна.

Эх сурвалж:www.polit.mn