Д.ОЮУНЧИМЭГ

Жижиг улаан дугуй унасан бяцхан хүү тайзны голд зогсов. “Сайн байцгаана уу. Сайхан хаваржиж байна уу” хэмээн үзэгч түмэнтэй цангинатал мэндэллээ. Авъяаслаг жаахан хүүг харсан олон алга нижигнүүлэн ташиж байв. Б.Бат-Энэрэл хүү “Миний зүрнээс гарсан дууг тээр тэнд байгаа хүний зүрхэнд хүрч аз жаргалтай болдог юм” гэв. Үнэхээр л түүний дуулсан дуу бүр зүрхэнд ойрхон сонстож аньсага чийгтэж байсан юм.

Завхан аймгийн Алдархаан сумын уугуул С.Батсүх захиралтай “Глобал” олон улсын сургуульд Б.Бат-Энэрэлийг үнэ төлбөргүй сургах батламжийг тоглолтын үеэр гардууллаа. 

Адислал хүссэн үзэгчид

Үе үехэн хоолой зангируулан элдвийг хүүрнэх хүүгийн чин сэтгэл нь өөрийгөө хайрлаж байгаа бусдыг тодоор харах. “Би ч бага насандаа та бүхнийхээ хайр хишгийг мөн ч их хүртэж байна даа. Ая дуугаараа та нарынхаа ачийг хариулнаа” гээд хоолой нь цахиртаж байгаа нь хэзээний том хүн шиг. Тэгсэн хэрнээ зүггүйхэн балчир хүү харагдана. Тоглолтыг үзэж суугаа үзэгчид дунд “Ер бишийн гоц авъяастай бяцхан жаалаас адис хүртээд буцахсан” гэх яриа гарч байв.

Ээжийнхээ энгэр өөд мацах бяцхан хүү

Дууг минь сонсдог ард түмэнтэй хүндээ би,

Дуулахыг минь заадаг эрэгтэй багштай хүндээ би

Асран хүмүүжүүлэх эмэгтэй багштай хүндээ би

                Алганы амт үзүүлдэг эмээтэй хүндээ би

                Гараас минь хөтөлдөг ижийтэй хүндээ би хэмээн дууныхаа завсар шүлэглэхэд нь үзэгчид нижгэнэтэл алга ташин “Тиймээ, монгол хүүхдүүд алганы амт үзэхдээ ч ухаарал авдаг юм” гээд настангууд хүүг өхөөрдөж байлаа.

Тоглолтын үеэр Б.Бат-Энэрэл хүүгийн ээж Солонгос улсад хүүгийнхээ эмчилгээний төлбөрийг олохоор ажиллаж байгааг хөтлөгч уламжилсан юм. Харин энэ тоглолт гэнэтийн бэлэгтэй байсныг хэн ч гадарласангүй. Бүр Энэрэл хүүгийн “эмээ” ч мэдээгүй байснаа хэлж байв. Учир нь хүүгийн ээж “Бат-Энэрэлтэй орчлон”-г дуусахын өмнөхөн Солонгосоос амжиж ирэн хүүгийн багш МУГЖ С.Батсүхэд хүндэтгэл үзүүлэв. Тайзнаа тожигнотол гүйж, багшийгаа налан үе үехэн эрхлэх бяцхан хүү ээжийгээ хараад хоромхон зогтуссанаа “Ээжээ” гээд угтан гүйлээ. “Том эр болсон юм чинь ээжийгээ санахгүй ээ” гэж байсан хүү гэнэн балчирхан зангаар ээжийнхээ энгэр өөд мацан тас тэвэрсээр тайзнаас буулаа. Харин МУГЖ С.Батсүх “Ээж нь Солонгост байгаа гэсэн биз дээ” хэмээн гайхширснаа “Миний харснаас өөр хүн байх чинь” гээд тээнэгэлзэж буйгаа үзэгчидтэйгээ хуваалцлаа. Гэнэтийн бэлэгл бол гэнэтийнх шүү дээ.

“Шаг”-ын тасалбар

Тоглолт эхлэхээс өмнө МҮЭСТО-ны үүдээр “Билет авъя” гэх хүмүүс холхилдож байсан. Зарим нэг нь хэт өндөр үнээр билетийг нь дамлаад байна шүү хэмээн зохион байгуулагчдад “алтан хошуу” хүргэж байв. Гэвч билет “шаглах” гэж байгаа юм биш биз гэж асуух боломжгүй тул хүмүүсийн авахыг хүссэн хэмжээгээр тасалбараа борлуулснаа тэд зорьж ирсэн үзэгчдэд тайлбарлаж байна лээ. Энэ үеэр ӨМӨЗО-ноос төлөөлөгчид тоглолт үзэхээр ирсэн байлаа. Тэд элэг нэгт бяцхан дуучинд эрүүл энхийг хүсэн хандив цуглуулснаа гардуулахын зэрэгцээ Б.Бат-Энэрэлийнхээ дуулахыг нь сонсохыг хүссэн ажээ. 

Бэлэгний хур

Тоглолтын өндөрлөх үеэр Б.Бат-Энэрэл хүүд урам хайрлаж, сэтгэлийн бэлэг бэлдсэн үе тэнгийн бяцхан үзэгчид тайз руу гүйлдэнэ. Үүнтэй зэрэгцэн өвөө, эмээ нар адис авахыг хүсч буйгаа илэрхийлэн хүүг тойрч бүчив. Авъяаслаг жаахан хүүг “Эгэлгүй нэгэн” хэмээн сүсэглэн хүндэтгэж байсан юм.

Элдэвтэй бяцхан хүүг минь түмний хайр ивээл тэтгэж, сайн яваад ирэхийн ерөөл өргөе.

Эх сурвалж: www.polit.mn