Т.САЙХАН

Гадаа бороотой, жиндүүхэн ч Сүхбаатарын талбай спортод хайртай хүмүүсээр дүүрэн байна. Өнөөдөр /05.20/ олон улсын автомашингүй өдөр тохиож байгаа билээ.  Мөн “Улаанбаатар марафон- 2017” тэмцээн амжилттай болж байна. Тэмцээний 10 км-ийн зайн марафон гүйлтэд МАХН-ын дарга Н.Энхбаяр оролцлоо.  Энэ зайг 50 минутын хугацаанд амжилттай туулан барианд оров.   Тэрээр “Марафонд анх удаагаа оролцож байна.  Залуустайгаа мөр зэрэгцэн амжилттай гүйлээ. Гүйлт бол эрүүл мэндийн спорт. Тиймээс хүн эрүүл бие, эрүүл амьдралын төлөө биеийн тамираар хичээллэх нь зөв юм. Үүнийг залуу үеийнхэндээ уриалмаар байна” гэв. Мөн марафонд МАХН-аас Ерөнхийлөгчийн сонгуульд нэр дэвшигч С.Ганбаатар дэмжигчээр оролцож байна.  Түүнээс сэтгэгдлийг нь сонслоо.  “Улаанбаатар марафонд олон сайхан монголчуудыгаа дэмжиж оролцож байна. Манай намын дарга Н.Энхбаяр гүйж өөрөө өөрийгөө хэрхэн ялан дийлэхийг  харууллаа. Ер нь хүн бүхнийг ялан дийлье гэвэл өөрт учирсан бэрхшээлийг хамгийн эхлээд даван туулах нь чухал юм. Энэ бол ялалтын үндэс билээ.  Өнөөдөр энэхүү марафонд оролцож байгаа хүмүүстэй баяр хүргэмээр байна” гэв. МАХН-ын дарга Н.Энхбаяртай хамт намын гүйцэтгэх товчооны гишүүн Д.Эрдэнэцогт гүйж барианд орлоо.  Тэрээр өмнө нь тус марафонд оролцож мөнгөн медаль хүртэж байсан туршлагатай нэгэн юм. Ийнхүү МАХН-ын удирдлагууд нэгэн өдрийг спортоор амьсгалан өнгөрүүллээ. 

Эх сурвалж:www.polit.mn