Гарма Гаржүд Үржинпэрэнлайлин хийдийн тэргүүн, гавж Д.Тайвансайхан жил бүр хийдэг зан үйлийн дагуу  энэ сарын 21 буюу  ням гаригийн 13 цагт  Залаатын амны баруун талд орших Умаахан толгойг тахих гэж байна. Энэ талаар тодрууллаа.

-Яагаад заавал энэ өдрийг сонгож уул, овоо тахихаар болов?

-Энэ өдөр улааны шашны хүн ардыг ивээн тэтгэгч, хүчит догшин сахиусууд залардаг гэж үздэг. Мөн лусын буулттай уул, уул овоо тахидаг өдөр юм. Тийм учраас байгальтайгаа нягт уялдаатай хүмүн бидэн уул овоогоо аргадан тахиж, хишиг буяныг дэлгэрүүлэх бүрэн боломжтой.

-Тахилгад ямар журмаар оролцож болох вэ?

-Оролцохыг хүссэн хүмүүст нээлттэй. Иргэд өөрсдийн хүсэл сонирхлын дагуу чөлөөтэй оролцож болно.

-Ер нь Умаахан толгойг өмнө нь тахиж байсан жишиг бий юу?

- Умаахан толгой бол 1913 оноос VIII Богдын зарлигаар тахиж шүтдэг болсон хайрхан юм. Социалист нийгмийн үед нэг хэсэг хориглож байгаад 2000 оноос тахилга шүтлэгийн зан үйлийг дахин сэргээсэн. Түүнээс хойш манай аав бид хоёр /түүний аав Гандантэгчилэн хийдийн цорж агсан Г.Диваасамбуу/ жил бүр тахиж ирсэн.

-Энэ өдөр Умаахан тоолгойг тахих нь ямар утга учиртай гэж үздэг вэ?

- Умаахан уулыг тахиснаар лусын хорлол, санаатай, санаандгүй үйлдсэн үйлийн үр нимгэрнэ гэж үздэг.

Эх сурвалж: www.polit.mn