Ц.БАЯР

Барилгын салбарынханд нэг нааштай мэдээ сонсогдов. Хөрөнгө оруулалтын таатай орчин бий болгох, гадны хөрөнгө оруулагчдын баталгааг хангах тал дээр салбарын яам болоод Барилгачдын Холбооны зүгээс анхаарал хандуулаад эхэлжээ. Гадны хөрөнгө оруулагчдын баталгааг хангахын тулд юуны өмнө хөрөнгө оруулалтын даатгалын тогтолцоог нэвтрүүлэх шаардлагатай гэж үзсэний үндсэн дээр БНСУ-ын даатгалын компаниудтай хамтран ажиллахаар болсон байна. Монголын даатгалын компаниуд ч хамтран ажиллах боломжтой. Одоогийн байдлаар “Ард даатгал” компани хөрөнгө оруулалтын даатгал дээр хамтран ажиллах хүсэлтээ холбогдох газруудад хүргүүлээд байгаа аж. “Хөрөнгө оруулах хүсэлтэй гадныхан хөрөнгө оруулалтын баталгаанаас гадна борлуулалтын баталгаа шаарддаг. Орон сууцны үнийн хувьд гадныханд хэт өндөр үнэ хэлээд хэрэггүй гэсэн байр суурин дээр байгаа. Тиймээс “Та бүхэн эхний удаагийн хөрөнгө оруулалтаас их хэмжээний ашиг битгий хараарай. Хамгийн чухал нь хөрөнгө оруулалтын даатгалд хамруулъя. Хөрөнгө оруулалтыг чинь даатгалын компаниудад давхар  даатгуулъя” гэж хэлж байна. Эхлээд Монголын даатгалын компанид даатгуулж, тэр компани нь цаашаа Солонгосын даатгалын компанид даатгуулдаг байхаар төлөвлөж, судалгааны ажилдаа орсон” гэж Монголын Барилгачдын Холбооныхон ярьсан. Хөрөнгө оруулалтын даатгалын тогтолцоог нэвтрүүлсэн тохиолдолд гадны хөрөнгө оруулагчид манай барилгын салбарт хөрөнгө оруулах үйл явц нэмэгдэж, төсөл нь зогссон олон аж ахуйн нэгжийн ажил сэргэж урагшлах сайн талтай байна.

Эх сурвалж:www.polit.mn