Т.САЙХАН

Гадаад хэлний гүнзгийрүүлсэн сургалттай 23 дугаар дунд сургуулийн сурагчид эрдмийн баяраа тэмдэглэлээ.  Энэ жил тус сургуулийн үсэг­лэлийн баяр “Яг түүн шиг” сэдвийн хүрээнд болов.  Сурагчид “Ну погади”, “Шидэт дагинас” гээд үлгэрийн баатруудын дүрд хувирч гэр бүлийнхэндээ юу сурч мэдсэнээ тайлаг­налаа. 2016-2017 оны хичээлийн жилд 23 дугаар сургууль орос, япон, англи, солонгос, хятад хэлний ангид 300 орчим сурагчийг элсүүлжээ. Ун­­шуулж, бичүүлж, бо­­дуулж  сургахын  зэ­рэгцээ  хүүхдүүдийн ур­лагийн авьяасыг нь нээж, хөгжүүлж буйг үсэг­лэлийн баяраас харж боло­хоор байв. 

23 дугаар сургуулийн 1а ангийн багш Б.Пүрэвдулам “Би боловсролын байгууллагад 14 дэх жилдээ ажиллаж байна.  Энэ жил гурав дахь нэгдүгээр ангиа төгсгөлөө.  Хүүхдүүд маань мянган жил, түмэн өдөр дурсагдах эх хэлнийхээ баялаг сайхнаар аялж, монгол хэлээрээ зөв ярьж, зөв бичиж, зөв уншиж сурах гараагаа эхэлж байна. Энэ жилийн эрдмийн баяраа “Яг түүн шиг” гэж нэрлэсэн нь хүүхдүүдэд илүү сонирхолтой, идэв­хитэй оролцох хүслийг төрүүлсэн болов уу” гэж байлаа.  Мөн энэ үеэр  23 дугаар сургуулийн сур­галтын менежер Б.Зээрээ “Өнөөдөр сурсан зүйлээ дүгнэж, эрдмийн баяраа тэмдэглэж байгаад баяртай байна. Үсэглэлийн баяраа тэмдэглэж, эрдэмд шамдах гараагаа эхлүүлсэн бяцхан сурагчиддаа алтан номын үсэг заалгаж амьдралын шинэ хуудсаа нээж байгаад нь баяр хүргээд аз жаргал, эрүүл энхийг хүсье. Багш хүний хүчин чармайлт, эцэг эхийн хамтын ажил­лагааны дүнд хүүхдүүд маань  уншиж, бичиж, бо­дож, сууж сурсан байна. Сайн сурсан хүүхдүүддээ, хамтарч ажилласан эцэг эхэд нь, сургаж чадсан багш нартаа талархаж байна” гэлээ. 23 дугаар сургуулийн 1а анги 60 орчим сурагчтай.  Хүүхэд нэг бүрийг хөгжүүлэх, урлаг, спорт, чөлөөт цагийг нь хэрхэн зөв өнгө­рүүлэх тал дээр ч багш нь анхаарч ажиллаж байна.  1а ангийн сурагч Т.Ананда “Би үсэглэлийн баяртаа С үсэг болсон. Сургуульд явах их гоё, энд олон зүйл сурч байна. Саяхан “Бага ангийн багшдаа баярлалаа” гэсэн дуу сурсан” гэв.  Ийнхүү хүүхдийг сонирхсон салбараар нь хөгжүүлж, дэмждэг нь тус сургуулийн онцлог бөгөөд энэ өдөр нэгдүгээр ангийн таван бүлгийн 300 хүүхэд үсэглэлийн баяраа урлагийн тоглолттой тэмдэглэн өнгөрүүлсэн юм.

Эх сурвалж: “Зууны мэдээ” сонин