Т.ДАЛАЙ

Хос цомгоороо хөгжмийн ертөнцөд эргэн ирсэн дуучин, ая зохиогч Б.Ангирмаагийн шинэ цомгийн өдөрлөг маргааш /05.13/ Hi-Fi Records төвд болох гэж байна.

“Удахгүй ээ”, “Өнгө аяс” нэртэй хос цомгоо тэрээр нэлээд хугацаанд бодож, төлөвлөж хийсэн бөгөөд цомогт багтсан дуунуудаа өөрөө дуулжээ. Цомгийн хэвлэлтийг Герман улсад хийлгэсэн байна.

“Өнгө аяс” цомогтоо дуучин Б.Ангирмаа бага насандаа зохиосон, дурсамж сэргээх, уянгын сайхан дуунуудаа багтаасан гэнэ. Өөрийнх нь болон түүний ах Б.Долгион, мөн Оргил, Баясук, Батхүү нарын аялгуугаар бүтсэн дуунууд уг цомогт багтжээ.  Тэрээр цомогтоо зориулсан хэвлэлийн хурлын үеэр “Энэхүү цомогт миний бага насандаа зохиож байсан уянгын дуунууд орсон. Арилжааны гэхээс илүү найз нөхөд, гэр бүл гээд дотнын хүмүүстээ бэлэглэх зорилгоор хэвлүүлсэн. Өнгөрсөн хугацаанд намайг хөглөж байсан сонсогч та бүхэндээ баярлалаа. Миний цомог таны олон сайхан дурсамжийг сэргэнэ гэдэгт итгэж байна” хэмээн ярьсан юм.

“Өнгө аяс” цомогт “Тал нутаг”, “Миний дуу”, "Чиний харцанд", "Би асуумаар...", "Намар ганцаардал", "Мөрөөдлийн мөнгөн хонхны дуу" зэрэг 12 дуу багтсан бол “Удахгүй ээ” цомгоос түүний "Ocean Grey" студийн залуустай хамтран хийсэн цоглог хэмнэлтэй "Тэнгис", "Зүүд байлаа", "Өө Barry", "Ирмэх төдийд" зэрэг уран бүтээлээ оруулжээ.Б.Ангирмаагийн фенүүдэд таатай мэдээ дуулгахад, цомгийн өдөрт ирсэн эхний 50 хүнд цомгоо бэлэглэх ажээ.

Эх сурвалж:www.polit.mn