Д.ОЮУН

Монгол Улсын Засгийн газраас зарласан “Ажил олгогч, даатгуулагчдаа дэмжих жил”-ийн хүрээнд Хөдөлмөр, нийгмийн хамгааллын яам ажилчдаа цомхотгож халаагүй, нийгмийн даатгалын хууль тогтоомжийн хүрээнд хүлээсэн үүргээ нэр төртэй биелүүлсэн, түүнчлэн сүүлийн гурван жилийн хугацаанд үйлдвэрлэлийн ямар нэг осол эндэгдэл гаргаагүй шилдэг 150 байгууллагыг шалгаруулан, талархал гардуулав. Нийгмийн даатгал төлдөг 43.9 мянган ажил олгогч байгууллагаас “ТОП” таван шилдэг ажил олгогч “Болор” өргөмжлөл авсан юм. Тодруулбал, “Мобиком” корпораци, “АПУ”, “Саусгоби сэндс” зэрэг компани шалгарлаа. Энэ үеэр Хөдөлмөр, нийгмийн хамгаалалын дэд сайд С.Мөнгөнчимэг “Ажлын байраа тогтвортой хадгалж, үйл ажиллагаагаа явуулж буй компаниудад амжилт хүсье. Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмжийн сангаас гурван жил дараалан төлбөр гаргаагүй, мөн таван жил дараалан ажилгүйдлийн даатгалын сангаас тэтгэмж гаргуулаагүй бол дараа жилд төлөх шимтгэлийг 10 хувь хөнгөлнө гэж заасан болзлыг хангасан 150 ажил олгогч, аж ахуйн нэгжид хөнгөлөлт үзүүлэх эрхийг баталгаажуулж байна” гэсэн юм.

Дашрамд дурдахад, 2014-2016 онуудад үйлдвэрлэлийн осол гаргаагүй 21 мянган ажил олгогчид 3.2 тэрбум төгрөг, 2012-2016 онуудад ажлын байраа тогтвортой хадгалж, ажилтнаа халаагүй 8.7 мянган ажил олгогчид 140.9 сая нийт 3.4 тэрбум төгрөгийн шимтгэлийн хөнгөлөлтийг ирэх онд үзүүлэх ажээ.

Эх сурвалж: www.polit.mn