Б.ЭНХ

Сэтгүүлчид олон нийтийн сүлжээнд байр сууриа илэрхийлэхдээ хэрхэн хандах вэ. Хувь хүний орон зай учраас ямар байр суурь илэрхийлэх нь сэтгүүлчийн хувийн асуудал уу, эсвэл... Хэвлэл мэдээллийн байгууллагын ажилтан, сэтгүүлчдийн нийгмийн сүлжээнд илэрхийлж байгаа байр суурь, хандлага нь нийгэмд хүчтэй нөлөөлөл үзүүлдэг, сэтгүүлчид ёс зүйн кодоо баримтлан ажиллах цаг үе ирснийг тодруулсан “Цахим орчин дахь бидний араншин” сургалтыг “Сэтгүүлч Батдорж сан”, “Хэвлэлийн эрх чөлөө” ТББ, Хэвлэл мэдээллийн зөвлөлөөс хамтран зохион байгуулав. Нэгэнт хувь хүний орон зай, сэтгүүлч ч өөрөө иргэн учраас нийгмийн сүлжээнд өөрийн хүссэн мэдээллийг түгээх, мэдээлэх, дэмжих эрхтэй гэж үзэх нэг хэсэг нийгэмд байна. Гэвч сэтгүүлч мэргэжил нь өөрөө олон нийтийг соён гэгээрүүлэх, тэнцвэртэй мэдээллээр хангах үүрэгтэй учраас цахим орчинд энэ зарчмаар ажиллах ёстойг сургалт зохион байгуулагчид онцолж байв. Олон улсын томоохон хэвлэл мэдээллийн хэрэгслүүд сэтгүүлчдээ цахим орчинд ажиллахдаа тухайн хэвлэл мэдээллийн байгууллагын нүүр царай, байр суурь гэж үзэн гэрээ байгуулдаг жишээг сургалтын үеэр дурдаж байв. Өөрөөр хэлбэл, сэтгүүлчийн цахим орчинд нийтэлсэн мэдээ, мэдээллийг олон нийт хамгийн түрүүнд мэргэжлийнх нь үүднээс, хамаарч байгаа байгууллагынх нэрээр хүлээж авдаг ажээ.

Эх сурвалж: “Зууны мэдээ” сонин