Ц.БАЯР

Өнгөрөгч долоо хоногт Ерөнхий сайд Ж.Эрдэнэбат барилга, бүтээн байгуулалтын талаар УИХ-ын чуулганд мэдээлэл хийлээ. Хямд өртөгтэй, хэдэн айлын орон сууц ашиглалтад орсон, "Түрээсийн орон сууц хөтөлбөр"-ийн хүрээнд хэчнээн иргэн хямд төлбөртэй төрийн түрээсийн орон сууцанд амьдрах болсон, цаашид хэдэн айлын орон сууц баригдахаар төлөвлөгдсөн, ипотекийн зээлийн хөтөлбөрт хэдэн иргэн хамрагдсан гэх зэргээр өмнөх Засгийн газрын үед хэрэгжсэн бүтээн байгуулалтын хүрээнд хийгдсэн ажлууд түүний мэдээлэлд дурдагдав. “Чингис бондын хөрөнгөөр орон сууцны хорооллууд барьсан, "Үнэ тогтворжуулах хөтөлбөр" нэрийн дор их хэмжээгээр бэлэн мөнгө хэвлэж ипотекийн зээлийг санхүүжүүлсэн” хэмээн өмнөх Засгийн газруудаа буруутгадаг атлаа, нүдэнд харагдаж, гарт баригдаж байгаа бүтээн байгуулалтууд, 90 мянган иргэнийг орон сууцтай болгосон "Ипотекийн зээлийн хөтөлбөр"-ийг Ерөнхий сайд их л нүүр бардам дурдаж байна лээ. Гэсэн санхүүжилт нь хязгаарлагдмал байгаа "Ипотекийн зээлийн хөтөлбөр"-ийн эх үүсвэрийг хэрхэн нэмэгдүүлэх, орон сууцны урьдчилгаа төлбөрөө төлж зээлд хамрагдах боломжгүй иргэдийг ямар арга замаар орон сууцжуулах, түрээслэгч иргэн төрийн түрээсийн орон сууцанд амьдрах хугацаандаа төлбөрөө төлж, яваандаа өмчилж авдаг системийг хэрэгжүүлэх, эсэх талаар ам нээсэнгүй. Олон тооны орон сууц ашиглалтад орсон хэдий ч бодит худалдан авалтаар баталгаажсан эрэлт байхгүй байгаа энэ үед ашиглалтад орсон болон цаашид ашиглалтад орох төрийн орон сууцны талаар л яриад өнгөрсөн нь хангалтгүй санагдав. Өмнөх Засгийн газруудын үед хийсэн ажлуудыг нэгэнтээ дурдсан юм чинь, иргэдээ орон сууцжуулдаг гадны туршлагуудыг хэрэгжүүлэхээр судалж, төлөвлөж байсантай нь ч сайтар танилцах хэрэгтэй. Олон улсын туршлагаас харахад  зөвхөн түрээслэх ,түрээсэлж байгаад өмчлөх, ямар нэгэн урьдчилгаа төлөхгүйгээр түрээсийн төлбөр дээрээ байрны үнийг шингээн төлөх байдлаар өмчлөх гэсэн гурван хувилбар гадны орнуудад хэрэгждэг байна. Эдгээр хувилбарыг ашиглан иргэдээ орон сууцжуулахад анхаарах шаардлагатай. Өөр олон ажил таныг хүлээж байна.

Эх сурвалж:polit.mn