Х.ХАТАН

Монголын өнөөгийн нийгэмд тулгамдсан асуудлуудыг шийдвэрлэхэд  хувь нэмрээ оруулж буй Иргэний нийгмийн байгууллагууд болон хувь хүмүүсийн санаачлага, оролцоогоор дамжуулан “Сайн дурын үйл ажиллагаа”, “Сайн дурын ажил” гэсэн ойлголт аль хэдийнэ танил болжээ. Гэсэн хэдий ч нэгдсэн ойлголтгүй, хууль эрх зүйн орчин нь бүрдээгүй өнөөдрийг хүрэв. Энэ асуудалд цэг тавьж, Монгол Улсад сайн дурын үйл ажиллагааг хөгжүүлэх, нэгдмэл ойлголттой болгоход шинэ алхам болж “Сайн дурын үйл ажиллагааны төв” албан ёсоор нээлтээ хийлээ.

“Сайн дурын үйл ажиллагааны төв”-ийн төсөл нь “GoandDo” олон улсын байгууллагын санаачлагаар Хөдөлмөр, Нийгмийн халамжийн үйлчилгээний Ерөнхий Газартай хамтран Койса-гийн дэмжлэг санхүүжилтээр хэрэгжиж байгаа юм. Эхний ээлжинд зургаан салбар төвийг нээжээ. 

Төсөл хэрэгжих хугацаа нь 2018 оны дуустал аж. Сайн дурын үйл ажиллагааны төвийг байгуулж, хэрэгжүүлэх газрууд нь Төрийн байгууллагуудын загвар болгон Хан-Уул дүүрэг, Баян-Зүрх дүүрэг юм. Харин Их дээд сургуулиудын загварт МУБИС, Отгонтэнгэр их сургууль бөгөөд Төрийн бус байгууллагын загвараар ADRF Монгол “Хүүхдийн Оюуны Боловсролыг Дэмжих Төв”, “Сайн хүн, Сайн нийгэм” зэрэг нийгэмд үйлчилдэг төрийн бус байгууллагууд багтжээ.

Сайн дурын үйл ажиллагааны төв болгон тус бүр гурван сайн дурын баг байгуулж ажиллах аж. Үүнд, Зорилтод бүлгийг хүүхдэд чиглэсэн, Хүрээлэн буй орчноо өөрчлөн хөгжүүлэхэд чиглэсэн, Бүс нутгийнхаа асуудлыг шийдэхэд чиглэсэн баг байгуулахаар болжээ. 

Сайн дурын үйл ажиллагааны тухай онолын үндэслэлтэй, нийгмийн шаардлагад нийцсэн боловсрол олгох, мэргэшүүлэх, өөрийн амьдарч буй бүс орон нутаг улмаар  нийгмийнхээ өмнө тулгамдсан асуудлыг шийдвэрлэхийн тулд иргэний сайн дурын ажлуудыг зохион байгуулах, тэд хамтдаа зөвлөлдөн нэгдэж хамтдаа өөрчлөгдөн хөгжиж орчин бүрдүүлэхийн төлөө ажиллах юм байна.

Сайн дурын үйл ажиллагааг удирдан зохион байгуулагчдад зориулсан  анхны сургалтыг энэ сарын 4-нд МУБИС дээр 30 хүний оролцоотойгоор хийснээр энэхүү үйл ажиллагаа эхэлсэн юм.

Эх сурвалж: "Зууны мэдээ" сонин