Т.САЙХАН

Монголын холимог тулааны “Зэв" холбоо тулааны спортыг хөгжүүлэхээр ажиллаж эхэллээ. Мэргэжлийн кикбоксын 64, 67 кг жингийн ангилалд Монголын шилдэг тулаанчид оролцох “Zev fight night -1" халз тулаан ирэх бямба гаригт болно. “Зэв” холбооны үүсгэн байгуулагч Б.Баярбямба “Бид холбоогоо байнгын тогтмол үйл ажиллагаа явуулдаг болгохыг зорьж байгаа. Нөгөө талаас “Zev” хэмээх монгол брэнд үүсгэхээр ажиллаж байна. Америкийн UFC шиг тогтмол үйл ажиллагаатай, цуврал тэмцээн уралдаан зохиодог, хүн болгонд танигдсан брэнд болох зорилготой. UFC холбоо дэлхий нийтийг хамарсан бол “One Championship” зүүн өмнөд азид, “Road” гэхэд Өмнөд Солонгос болоод азид алдартай байх жишээтэй. Харин бидний зах зээл бол манай холбооны нэрнээс тодорхой харагдаж байгаа байх. Зэв бол Их Чингис хааны есөн өрлөгийн нэг. Тэр утгаараа монгол туургатан дунд тэмцээн уралдаан зохион байгуулна, зах зээлээ ч монгол туургатнууд гэж харж байгаа” гэв.  Ирэх бямба гаригт болох халз тулаанаас шалгарсан хоёр тамирчин ирэх тавдугаар сарын 28-нд Япон улсад болох “Stant fighting network k-ing" тэмцээнд эх орноо төлөөлөн дэлхийн шилдгүүдтэй тулалдах эрхтэй авна. Энэхүү олон улсын тэмцээнийг мэргэжлийн кикбоксын K-1 -ийн хүнд жингийн дэлхийн дөрвөн удаагийн аварга Эрнесто Хоост-ын нэрэмжит “Hoost Cup" болон Японы “Kickboxing Promotion Association" байгууллага хамтран зохион байгуулж байгаа юм. Монголд болох тэмцээнийг олон улсын K-1 -ийн мэргэжлийн хоёр шүүгч ирж шүүх ба хүндэт зочноор алдарт тамирчин Эрнест Хоост ирж Монголын тамирчдад сургалт хийхээр болжээ.  

“Zev fight night -1" халз тулаанд 64 кг жингийн ангилалд “Бүгэнжюкү" клубын тамирчин, “Ирээдүй MMA" клубын дасгалжуулагч Д.Батгэрэлтэй “Heroes" клубын Н.Бат-Эрдэнэ, “Гаруда ММА" клубын Б.Гантогтохтой “One Team" клубын Г.Энхбаяр тулалдана. Харин 67 кг жингийн ангилалд “Ирвэс" клубын Н.Отгонбаатарын эсрэг “Мандал Файтинг" клубын Г.Мөнх-Од, “Бурхан халдун" клубын А.Мөнхбаатарын эсрэг “Ихэр бээлий" клубын Э.Батбаяр нар тулалдана.

Эх сурвалж:www.polit.mn