Зорчигч тээврийн нэгтгэл ОНӨААТҮГ-ын ажилчид өнгөрсөн сарын 27-ны өдөр Эв нэгдэл Үйлдвэрчний эвлэлийн хороог хуралдуулжЦ.Ариунбаатарыг даргаар нь сонгожээ. Уг хуралдаанаар Зорчигч тээврийн нэгтгэл ОНӨААТҮГ-ын 1590 ажилтнаас 1274  ажилтан гишүүнээр элсэж батламжаа гардан авсан бөгөөд бүтэц бүрэлдэхүүний хувьд 28 тэргүүлэгч, хяналтын хорооны 11 гишүүнийг баталжээ.

2016 оны эхээр түр үйлдвэрчний эвлэлийн хороо байгуулж эрх ашиг хөндөгдсөн олон асуудалд дуу хоолойгоо өргөх хөтөч болохоор нэгдсэн 5 үйлдвэрчний байгууллага нь Үйлдвэрчний эвлэлийн байгууллагын дүрэм, Хамтын гэрээний заалт, тэргүүлэгчдийн хуралдаан, хагас бүтэн жилийн үйл ажиллагааны тайлан зэргийг хамт олондоо хэлэлцүүлдэггүй, нэг ч хуралдаан хийдэггүй, хамт олны эв нэгдлийг хангаж чаддаггүй зэрэг шүүмжлэлийг ихээр дагуулж, үйл ажиллагааны хувьд доголдож эхэлсэн. Тиймээс ажилчдынхаа үг хэлэх, эвлэлдэн нэгдэх эрх чөлөөг хангах, эрх ашгийг нь хамгаалах зорилгоор байгуулагдсан Эв нэгдэл үйлдвэрчний эвлэлийн хорооны тэргүүлэгчид 04 сарын 26-ны өдөр хуралдаж нэгтгэлийн захиргаатай Хамтын гэрээг Монгол улсын Үндсэн хууль болон Хөдөлмөрийн тухай хууль, Үйлдвэрчний эвлэлийн тухай хуулиудыг иш үндэс болгон байгуулсан байна.

Ийнхүү Зорчигч тээврийн нэгтгэл ОНӨААТҮГ-ын ажилтнууд хөдөлмөрлөх эрх, хууль ёсны ашиг сонирхлыг тууштай хамгаалж чадах ҮЭ-ээрээ дамжуулан дээд шатны байгууллагатайгаа хамтын гэрээ хэлэлцээр байгуулж, хөнгөлөлт тусламж дэмжлэгийг авах боломжийг бүрдүүлсэн хууль ёсны байгууллагатай болж чаджээ.

Эх сурвалж: "Зууны мэдээ" сонин