Ц.БАЯР

АН-аас Ерөнхийлөгчийн сонгуульд нэр дэвшихийг горилогчид намын жирийн гишүүдээсээ  дэмжлэг авах гэж  өнгөрсөн хэд хоногт аймаг, нийслэл дүүрэг бүрт л  идэвхитэй ажиллалаа.  АН дотоод сунгаагаар анхан шатны нэгж болсон жирийн гишүүдийн саналаар Ерөнхийлөгчийн сонгуульд нэр дэвшигчээ сонгох дүрэмтэй. Энэхүү дүрмийн дагуу өнөөдөр /05.03/ жирийн гишүүдийнхээ  саналыг онлайн хэлбэрээр авч тодруулна. Одоогоор Ерөнхийлөгчийн сонгуульд нэр дэвших хүсэлтээ зургаан хүн албан ёсоор хүргүүлээд байна.  Тэд хувь хувьдаа өөрийн төлөөний хүнээ аймаг, нийслэл бүрт томилж намын гишүүдэд сургалт зохион байгуулж буй нэрээр хоолонд оруулж дайлж цайлан ууж идүүлэх, мөнгө тараах гээд л ёстой УИХ-ын сонгууль шиг л юм болж байна. Хэдийгээр намын анхан шатны байгууллага бүх гишүүдийнхээ саналаар Ерөнхийлөгчийн сонгуульд өрсөлдөх эрхмийг сонгохоор дүрмээ шинэчлэсэн гэж буй боловч  дотроо хэд хэдэн фракцид хуваагдсан.  Тус намын хувьд энэхүү дүрэм нь  гишүүдийн хуваагдлыг улам гааруулсан ёстой мафын дүрэм гэлтэй. Ганцхан өдрийн дотор онлайн хэлбэрээр бүх гишүүдийн саналыг нэгтгэж дүрмийн дагуу хамгийн олон дэмжлэг авсан  2-3 хүнийг тодоруулна гэнэ. Тэгэхээр хоёр эсвэл гурван ч хүн байж болно гэж дүрэмд тусгасан нь нэг л эргэлзээтэй. Хамгийн их санал авсан горилогчдыг намын их хурлаар оруулж  төлөөлөгчдийн олонхийн саналаар  нэгийг нь сонгож батламжилна. Өөрөөр хэлбэл их хурлын төлөөлөгчид болох ҮБХ-ын 380 гишүүн, аймаг нийслэлийн намын дарга нар сонгож батлах дүрэмтэй. Өнөөдөр /05.03/ С.Эрдэнэ тэргүүтэй шонхор,  Х.Баттулга  тэргүүтэй МОАХ фракцынхан энэ намын олонхи болж намын төв байгууллагыг удирдаж буй энэ үед хэн хамгийн олон санал авах вэ гэдэг нь тодорхой болсон ийм л мафын гэмээр дүрэм АН-д үйлчилж байна. ҮБХ-нд шинээр сонгогдсон гишүүд бүгд л олонхи болсон  мафийн горилогчид санал өгөх үү эсвэл үнэхээр энэ намыг цаашлаад Монгол улсын тусгаар тогтнол эв нэгдлийг хангаж чадахуйц  эрхмийг сонгох уу гэдгийг харах үлдлээ. Өнгөн дээрээ намын анхан шатны нэгж үүр, жирийн гишүүдийн оролцоотойгоор нэр дэвшигчийг сонгож байгаа мэт харагдаж буй боловч цаанаа аль хэдийн мафийн дүрэм үйлчилсээр. Ерөнхийлөгчийн сонгуульд нэр дэвших дүрэм ийм мафийн шинжтэй байхад бусад УИХ-д нэр дэвших дүрэм бол бүр ойлгомжтой ажээ. Юутай ч  өнөөдөр /05.03 / асуулга зохион байгуулна. Асуулгад нэр дэвшиж буй бүх хүмүүс оролцоно. Хамгийн олон дэмжлэг авсан нэр дэвшигчийг тодруулж, улмаар АН-ын VIII их хурлаар оруулж нууц санал хураалтаар баталгаажсанаар АН-аас Ерөнхийлөгчийн сонгуульд нэр дэвшигч тодорно. Нууц санал хураалт гэхээр л бүх юм ойлгомжтой нь эндээс харагдаад байх шиг.

Эх сурвалж:www.polit.mn