Т.САЙХАН

"Space" энтертайнментийн залуу уран бүтээлчид нэгэн сонирхолтой тоглолт хийх гэж байна. Тоглолтын онцлог нь үлээвэр найрал хөгжим (Wind & brass instrument)-ийг электроник хөгжимтэй хослуулах юм. Электроник хөгжим дээр л тоглож болдог алдартай аяз, хөгжмийг тэд үлээвэр найрал хөгжимтэй хослуулан тоглохоос гадна дэлхийд алдартай рок, поп дуунуудыг ч мөн тоглож болдгийг харуулна гэж байв.  "Space night" тоглолтод "Space" энтертайментийн "Mystical" брасс электроник хамтлаг болон жазз дуучин Оюундарь, chill pop дуучин Гүли, R&B soul дуучин Мияа зэрэг 11 залуу уран бүтээлч оролцон тоглож, амьд хөгжим болон элекроник хөгжмийн зохицлын гайхамшгийг мэдрүүлэх юм.
"Space" энтертайнмент нь "Миний Улаанбаатар" нэртэй төсөл хэрэгжүүлж байгаа бөгөөд энэхүү төсөл нь таван цуврал баримтат киноноос бүтэх юм байна. "Space" энтертайнментын захирал Э.Тэмлүүн “ Бидний хэрэгжүүлж буй төслийн гол зорилго нь Улаанбаатар хотын иргэн бүрийн оролцоо их хотын минь ирээдүйн хөгжилд томоохон хөрөнгө оруулалт болохыг уриалах явдал юм. "Миний Улаанбаатар" төслийн эхний бүтээл болох "Баатар" баримтат кино 2017 оны хоёрдугаар сарын 16-нд "Icinema" кино театрт нээлтээ хийсэн билээ. Төслийнхөө хүрээнд бид Улаанбаатар хотын ойролцоо орших хүүхэд, эмэгтэйчүүдийн хорих, асрамжийн газарууд болон цэргийн ангиудаар киногоо үнэ төлбөргүй гаргасаар байна. Харин тун удахгүй бүтээлээ олон нийтийн телевиз, сошиал сувгуудаар түгээх юм. "Баатар" баримтат кино нь манай нийгмийн томоохон асуудал болсон архины эсрэг бүтээл билээ. Харин "Space night " тоглолт нь "Миний Улаанбаатар" төслийн хоёр дахь бүтээл болох хогны асуудлыг хөндөх "Баялаг" төслийн төсвийг бүрдүүлэх зорилготой юм” гэв.  Улаанбаатар хотдоо хайртай, хогны эсрэг хүн бүхэн уг тоглолтод нэгдэхийг залуу уран бүтээлч уриаллаа.

Эх сурвалж:www.polit.mn