Д.ЧИМЭГ

“Эрдэнэс тавантолгой” компанийн хувьцаа эзэмшигчдийн ээлжит хурал өнөөдөр /2017.04.28/ нээлттэй болов. Хувьцаа эзэмшигчдийн ээлжит хурлыг тус компанийн гүйцэтгэх захирал Ц.Түмэнцогт даргалж, иргэд, аж ахуй нэгжийн төлөөлөл бүхий 100 хувийн ирцтэйгээр хурал эхэллээ. Энэ хурлаар “Эрдэнэс тавантолгой” компанийн өнгөрсөн оны үйл ажиллагааны болон санхүүгийн тайлангийн талаар Төлөөлөн удирдах зөвлөлийн гаргасан дүгнэлтийг хэлэлцэн баталсан юм. Хурлын үеэр компанийн өнгөрсөн жилийн үйл ажиллагаа, санхүүгийн байдал, компанийн засаглалын асуудлаар оролцогчид харилцан санал солилцов.

Энэ үеэр компанийн ТУЗ болон удирдлагын зүгээс сүүлийн хагас жилд менежментийн оновчтой бодлого баримталж ажилласны үр дүнд Цанхийн баруун уурхайн үйл ажиллагааг сэргээн орлогоо нэмэгдүүлсэн. Мөн зүүн уурхайг тогтвортой ажиллуулан “Чалко Трейдинг Хонг Конг” компанид төлөх төлбөрийн хэмжээг бууруулсан. Хөдөлмөрийн болон байгаль орчин, эрүүл ахуйн осол, аюулгүй ажилласан тул өнгөрсөн жилийн ажлын үр дүнг хангалттай гэж дүгнэв.

Хувьцаа эзэмшигч иргэд болон аж ахуйн нэгжийн төлөөллүүд компанийн гүйцэтгэх удирдлага, хамт олон хичээл зүтгэл гарган ажиллаж байгааг үнэлж, компанийн засаглалыг сайжруулан ашигтай ажиллахыг сануулсан юм. Мөн иргэдийн 1072 хувьцааг амилуулах ажлаа түргэвчлэхийн тулд хувьцаа эзэмшигч иргэд, аж ахуйн нэгж байгууллагуудтай хамтарч ажиллах даалгавар өгч байлаа.

Мөн хувьцаа эзэмшигчдийн ээлжит хурлаас гарсан санал зөвлөмжийг анхаарч, компанийн энэ жилийн эдийн засгийн үндсэн үзүүлэлтийг хангаж ажиллахыг “Эрдэнэс тавантолгой” компанийн Төлөөлөн Удирдах Зөвлөлийн дарга У.Бямбасүрэн, гүйцэтгэх захирал Д.Ариунболд нарт үүрэг болгосон аж.

Эх сурвалж: www.polit.mn