С.САРУУЛ

Өнөөдөр өглөө /2017.04.24/ УИХ-ын гишүүн О.Баасанхүүг өрөөгөө суллаж өгөхийг шаарджээ. Тэрээр энэ тухайгаа “Өглөө ажилдаа ирэхэд өрөөгөө суллаж өгөх гэсэн. Нэг ёсондоо намайг Төрийн ордоноос өрөөнөөс минь хөөлөө. Тиймээс би УИХ-ын даргын өрөөний үүдэнд, булангийн коридорт сууж байна” гэсэн юм.

Харин нөгөө тал буюу УИХ-ын Тамгын газраас О.Баасанхүүгийн өрөөнд АН-ын дарга С.Эрдэнийг оруулах зохицуулалт хийсэн талаараа тайлбарлалаа.

Мөн түүнчлэн О.Баасанхүү гишүүн сэтгүүлчдэд мэдээлэл өгөхдөө “Төрийн ордонд тэр сууна, энэ суухгүй гэдэг өрөө байдаггүй. Өрөөндөө жил шахам болох гэж байна. Чуулганы үйл ажиллагаа хэвийн явж байхад ингэж хүндрүүлж байгаа нь таалагдахгүй байна. Нарийн яривал УИХ-ын даргын өрөө ч гэж байхгүй. Ганц гишүүнийг хэн ч биш болго гээд явуулаад байгаа зүйл шүү дээ” хэмээсэн юм.

Нээрэн л хэн гэдэг гишүүн Төрийн ордны аль өрөөнд суух нь ямар хамаа байна. Хоёр тасалгаатай өрөөнд суулаа гээд ард түмнээ сонсдог, шударга болчихгүй. Төрийн ордон, чуулган, байнгын хорооны үйл ажиллагаа хэвийн л явагдана. Ер нь АН-ын дарга С.Эрдэнэд  “Би заавал О.Баасанхүүгийн өрөөнд сууна” гэж дайрах эрх ямба, өрөө тасалгаагаа голж шилж явах зав  баймааргүй. УИХ-ын Тамгын газар ч ийм жижиг сажиг зүйлээр хөөцөлдөөд улстөржилт хийгээд байгаа нь зохимжгүй. Магадгүй сөрөг хүчин байх бяр нь хүрэхгүй байгаа АН-аас илүү эрх баригчдыг сөрж байгаа О.Баасанхүү гишүүнийг бөөрөлхөх арга хэлбэр ч байж мэдэх юм. Үнэндээ О.Баасанхүү буланд суусан ч гэсэн нэг их чанарын ялгаагүй биз.

Эх сурвалж: www.polit.mn