Т.САЙХАН

ХБК-ийн Цохивор хөгжмийн чуулга ирэх амралтын өдөр /04.21,22/ Улаанбаатар чуулгын танхимд тоглолтоо хүргэх гэж байна. Гавьяат багш Б.Зоригт тус чуулгын уран сайхны удирдаачаар ажилладаг бөгөөд 1985 оноос чуулгын уран бүтээл эхэлжээ.  Тэрээр “Бид дэлхийн сонгодог цохивор хөгжмөөр тоглодог. Энэ хөгжим маань дэлхийн соёлтой улс гүрнүүдэд бүгдэд нь байдаг. Сонгодог царгил хөгжим гэж ч нэрлэж болно. Төрлийн хувьд металл болон халуун орны зандан мод гээд маш олон материалаар хийсэн байдаг.  Мөн сэгсэрч, маажиж тоглодог. Янз бүрийн дуу авиа гаргадаг гээд бараг л 40-өөд төрлөөр тоглож байна” гэж байна.  Цохивор хөгжмийн чуулга нь 2012 оны “Мөнгөн хараацай” наадмын тэргүүн байр, Юнескогийн Хүүхдийн урлагийн аравдугаар наадамд  амжилттай оролцож байсан бөгөөд авьяаслаг 18 залуу уран бүтээлчдээс бүрддэг юм.

Тэдний “Найруулга” тоглолт 2007 оноос эхлэн уламжлал болгон тасралтгүй арав дахь жилдээ эгшиглэх гэж байгаа бөгөөд уг тоглолт нь дэлхийн болон үндэсний сонгодог  бүтээлээс бүрдэх юм. Д.Манчини, Э.Морриконе, Floyd Werle, Randall Eyles-ын уран бүтээлүүдийг тоглох ба Монголын нэрт хөгжмийн зохиолчид Н.Жанцанноров Л.Мөрдорж, Цохивор хөгжмийн чуулгын удирдаач Б.Зоригт нарын шилдэг болон шинэ найруулгын бүтээлүүдийг сорчлон 20 бүтээлээ үзэгчдэд толилуулах юм байна. Мөн тэд жил бүр Холливудын алдартай киноны хөгжмүүдээс эхлээд орчин үеийн урсгал, бөмбөрийн шинэ үзүүлбэр зэрэг маш өргөн хүрээг хамарсан, сонирхолтой, өвөрмөц байхад анхаарч ирсэн байдаг.  Хөтөлбөрт ордог зохиолууд маш гүнзгий агууламжтай, суут зохиолчдын бүтээлийг сорчлон сонгож тоглодогт онцлог нь оршиж байна.

Эх сурвалж:www.polit.mn