Т.САЙХАН

Таван толгойн цэргийн ангийн сургалтын төвд дадлага сургуулилт хийж байсан цэргүүдийн гранат дэлбэрч, хоёр хүн нас барж, найман хүн шархадсан ноцтой осол гарсан билээ. Зэвсэгт хүчний салбарт удаа дараа ийм асуудал гарсанд салбарын сайд нь хариуцлага хүлээж огцрох ёстой гэдэг байр суурийг сөрөг хүчнээс эхлээд эрх баригч намын зарим гишүүд илэрхийлэх болсон. Харин Батлан хамгаалахын сайд Б.Бат-Эрдэнэ өөрийгөө хамгаалж, ЗХЖШ хариуцлага хүлээх ёстой хэмээн үзэж байгаа билээ.  Энэ талаар УИХ-ын гишүүн, Аюулгүй байдал, гадаад бодлогын байнгын хорооны дарга Ж.Энхбаяр үзэл бодлоо илэрхийлжээ. Тэрээр “Яагаад ийм байдал бий болов гэдгийг дүгнэх хэрэгтэй. Цэргийн алба бол байнгын бэлтгэл сургуулилт шаардлагатай байдаг. Асуудалд хэн буруутай вэ гэхээр УИХ төсөв баталж чадахгүй, төсвийг өргөн барьж байгаа Засгийн газар гэж бодож байна. Түүнээс биш хөдөө хөхөрч, гадаа гандаж, үүргээ гүйцэтгэж яваа цэргийн албан хаагч, бэлтгэгдсэн цэргийн дарга нараа буруутгахыг хүсэхгүй байна. 
Тэр надад сонин сонсогдохгүй байна. Үнэхээр Монгол Улсад Зэвсэгт хүчин байгаа бол түүнд шаардлагатай бэлтгэл, сургуулилт хийх, үүрэг биелүүлэх чадавхийг төр засаг бүрдүүлэх ёстой. Энэ үүргээ УИХ биелүүлээгүй.УИХ хариуцлага хүлээх ёстой. Ямар зардлыг хасах ёстой вэ, хасах ёсгүй вэ гэдгийг бодох ёстой. Төрийн үндсэн үүрэг бол ард түмнийхээ аюулгүй байлыг хангах ёстой. Энэ ганцхан зэвсэгт хүчин биш, хилийн цэрэг, дотоодын цэрэг, цагдаа  гээд бүхий л тусгай чиг үүргийн байгууллагуудын бэлтгэл сургуулилтын зардал байнга хасагдаж байна. Энд улстөржилт явагдаж, арьсаа хамгаалахыг би таашаахгүй байна. Бодит байдал бол миний хэлсэн зүйл. Үнэхээр ажиллах нөхцлийг чинь хангаж өгчихөөд эргээд хариуцлага шаардаж байгаа бол нэг өөр. Боломж хязгаарлагдмал, асар их үүрэг өгчихөөд хариуцлага нэхэх бас амаргүй. Тэрийг хүн болгон ойлгох хэрэгтэй” гэжээ. 

Эх сурвалж:www.polit.mn