Т.САЙХАН

Дэд хурандаа Н.Ууганбаяр захирагчтай энхийг сахиулагчид үүргээ амжилттай биелүүлээд өчигдөр /04.19/ эх орондоо ирлээ. Исламын Бүгд Найрамдах Афганистан улсад явагдаж буй "Шийдвэртэй дэмжлэг" ажиллагаанд АНУ-ын Зэвсэгт хүчинтэй хамтран үүрэг гүйцэтгэсэн Монгол Улсын Зэвсэгт хүчний IV ээлжийн цэргийн багийг ЗХЖШ-ын орлогч дарга, хошууч генерал Ж.Бадамбазар тэргүүтэй албаныхан “Чингис хаан” олон улсын нисэх буудлаас тосч авсан юм. Хошууч генерал Ж.Бадамбазар “Эх орон, Зэвсэгт хүчний өгсөн үүргийг амжилттай гүйцэтгээд ирсэн та бүхнээрээ бахархаж байна. Ажиллагааны газар оронд үндсэн үүргээ гүйцэтгэхээс гадна эх орноо сурталчилж, монгол цэрэг ямар чадвартай вэ гэдгийг олон улсад таниулсанд тань баяр хүргэе” гээд зэвсэгт хүчинд өрнөсөн цаг үеийн мэдээллийг хүргэсэн. АНУ-ын Зэвсэгт хүчинтэй хамтарсан Монгол Улсын Зэвсэгт хүчний цэргийн баг “Шинэ Кабул” баазын аюулгүй байдлыг хангах үүрэгтэй бөгөөд 2015 оны хоёрдугаар сараас анхны ээлж үүрэг гүйцэтгэж эхэлсэн юм.  Энэ удаагийн цэргийн багт Зэвсэгтхүчний 30 гаруй анги,байгууллагын алба хаагч хүлээсэн үүргээ ийнхүү амжилттай гүйцэтгээд эх орондоо ирэв. Энхийг сахиулагчдын сэтгэгдлээс хуваалцлаа.

Цэргийн багийн захирагч, дэд хурандаа Н.Ууганбаяр: Эх орондоо ирэх сайхан байна

 “Өмнөх цэргийн багуудын адилаар ажиллагааны газар оронд гар нийлэмжтэй байж, үүргээ амжилттай биелүүлсэндээ баяртай байна. Манай багийнхан цагийн байдал тогтворгүй байснаас үүдээд илүү хугацаатай ажилласан байгаа. “Эх орон, зэвсэгт хүчний удирдлагын өгсөн үүргийг амжилттай гүйцэтгэлээ” гэж ЗХЖШ-ын дарга нартаа илтгэл өгөх үнэхээр сайхан байна.  Үндсэн үүргийнхээ хажуугаар алба хаагчдаа хөгжүүлэхэд анхаарлаа. Жишээлбэл, манай багийн бүх алба хаагч англи хэлний анхан шатны мэдлэгтэй болсон байгаа” гэлээ. 

Дэд ахлагч Н.Шинэбаяр:  Гэр бүлийнхэн маань намайг тосохоор Өмнөговиос ирсэн байгаа

-Үүргээ амжилттай гүйцэтгээд ирсэндээ баяртай байна. Эх орондоо газардахад сэтгэл хөдлөөд  сайхан байлаа. Гэр бүлийнхнээ маш их саналаа. Тэд  маань намайг тосохоор Өмнөговиос ирчихсэн байгаа.

Ахмад Б.Энх-Оргил: Ажиллагааны газар оронд нэгнээ гэсэн сэтгэл дүүрэн байлаа, бидэнд

-Эх орондоо ирэхэд сэрүүн салхитай, хүйтэн өдөр байгаа ч миний зүрхэнд дэндүү халуун байна. Зэвсэгт хүчний удирдлагын өгсөн үүргээ бүрэлдэхүүнээрээ биелүүлээд уужим амьсгаа авах сайхан шүү. Хүүгээ л их санасандаа.  Эх орон минь дэндүү сайхан юм. Ажиллагааны газар оронд нэгнээ гэсэн сэтгэл дүүрэн байлаа, бидэнд.  Гадаадын цэргүүд бид бүхэнд хүндэтгэлтэй хандаж, монгол цэргүүд та нар мундаг шүү гэж их хэлдэг байсан. Цаашдаа Зэвсэгт хүчний хөгжлийн төлөө хичээх болно. 

Одоогийн байдлаар Афганистан Улсад явагдаж буй “Шийдвэртэй дэмжлэг” энхийг дэмжих ажиллагаанд Монгол Улсын Зэвсэгт хүчний цэргийн багууд Кабул, Мазар-И-Шариф хотууд дахь эвслийн цэргийн хүчний баазуудын аюулгүй байдлыг хангах үүргээ нэр төртэй гүйцэтгэж байна.

Эх сурвалж:www.polit.mn