Б.ЭНХ

Цаг уур, орчны шинжилгээний газрын Урьдчилан мэдээлэх хэлтсийн дарга Л.Оюунжаргалаас цаг агаарын төлөв байдлын талаар тодрууллаа.

-Нийслэл хотод шороон шуургатай таагүй өнжлөө. Орон даяар салхи, шуургатай байна уу?

-Ойрын өдрүүдэд салхи шуургатай байна. Өнөөдөр ойрын өдрүүдийн хувьд хамгийн их идэвхтэй цаг уурын онцгой нөхцөл байлаа. Үүнтэй холбоотой анхааруулга мэдээллийг олон нийтэд хүргэсэн. Одоогийн байдлаар өглөөнөөс Архангай, Булган, Өвөрхангай, Баянхонгор аймагт хүчтэй цасан шуурга шуурч эхлээд Төв аймгийн нутаг, Улаанбаатарт, Дундговийн нутгийн баруун хэсэгт үргэлжилж байна. Өнөөдөр Улаанбаатарт гэхэд нойтон цас хаялж дараа нь шороон шуурга шуурлаа. Бороо ч орсон. Энэ бол хаврын улиралд тохиолддог үзэгдэл. Нутгийн хойд хэсгээр буюу Булган, Сэлэнгийн нутгаар зарим газар нь цасан шуурга шуурч, нойтон цас орж байна.

-Цаг уурын энэ үзэгдэл хэр удаан үргэлжлэх вэ?

-Өнөө шөнө Хэнтийн өмнөд, Сүхбаатар аймгийн нутгаар цасан шуургатай. Маргааш нутгийн өмнөд хэсгээр хүчтэй салхи, шороон шуурга шуурна.

-Малчид, иргэдэд юуг анхааруулах вэ?

-Цасан шуурга малчид, замын хөдөлгөөнд хүндрэл учруулдаг. Тиймээс бид тухай бүрт сэрэмжлүүлэг мэдээг орон нутагт илгээж байна. Маргааш Хэнтий, Сүхбаатарын нутгаар зорчих иргэд маш сайн бэлтгэлтэй гарахыг анхааруулж байна. Малчид ч мөн адил сэрэмжтэй байгаарай.

Эх сурвалж: www.polit.mn