С.САРУУЛ

Хуульзүйн байнгын хорооны хуралдаанаар өнөөдөр /2017.04.18/  Засгийн газраас 2016 оны арванхоёрдугаар сарын 28-ны өдөр өргөн барьсан Үндэсний төлбөрийн системийн тухай хуулийн төсөлтэй хамт өргөн мэдүүлсэн Эрүүгийн хуульд нэмэлт, өөрчлөлт оруулах тухай, Зөрчлийн тухай хуульд нэмэлт, өөрчлөлт оруулах тухай хуулийн төслүүдийн анхны хэлэлцүүлгийг хийв. Энэ үеэр Монголбанкны дэд ерөнхийлөгч Б.Лхагвасүрэнгээс зарим зүйлийг тодрууллаа.

-Хуулийн төслийг боловсруулах шаардлага юу байв?

-Их, бага хэмжээний дүнтэй гүйлгээ, картын тооцоо, опетарорууд, арилжааны банкууд, банк бус санхүүгийн байгууллага гээд Монгол Улсын төлбөрийн системд олон байгууллага оролцдог. Үүнд  Монголбанк гол зохион байгуулагчаар ажилладаг. Үндэсний төлбөрийн системийн тухай хуулийн төсөл батлагдсанаар төлбөрийн системд оролцогч талуудын үйл ажиллагааны аюулгүй байдлыг хангах эрх зүйн орчин бүрдэх юм байна. Үүнтэй холбоотойгоор Эрүүгийн хуульд нэмэлт, өөрчлөлт оруулах тухай, Зөрчлийн тухай хуульд нэмэлт, өөрчлөлт оруулах тухай хуулийн төслүүдийг боловсруулсан бөгөөд төлбөрийн системд зөвшөөрөлгүйгээр оролцсон, эсвэл хуурамч баримт материал бүрдүүлэн хууль бусаар зөвшөөрөл авсан тохиолдолд хариуцлага тооцох тухай заалтуудыг тусгасан.

- Хууль батлагдсанаар арилжааны банкуудын шимтгэлд өөрчлөлт орох уу?

- Өнөөдрийн байдлаар Монгол Улсад үйл ажиллагаа явуулж буй арилжааны банк бүр иргэдэд үзүүлж буй картын үйлчилгээний цар хүрээ, зардал, үйл ажиллагаанаасаа хамаараад янз бүрийн шимтгэл авч байна. Харин Үндэсний төлбөрийн системийн тухай хуулийн төсөлд эдгээрийг нэгдсэн системд оруулж, үйлчилгээний шимтгэлийн дээд хязгаарыг Монголбанк тогтоохоор тусгасан.

-УИХ-ын зарим гишүүд цахим мөнгийг төлбөрийн системд ашиглах талаар хөндөж байна. Энэ зохицуулалтыг тусгаж өгсөн үү?

- Монгол Улсын төлбөр тооцоонд хэрэглэж буй гол мөнгө бол төгрөг, харин техник, технологийн дэвшилтэй холбоотойгоор бүтээгдсэн, төгрөгийг орлуулж болохуйц төлбөрийн хэрэгслүүдийг цахим мөнгө хэмээн хуулийн төсөлд тодорхойлсон. Цахим мөнгийг Монголбанкнаас өгсөн тусгай зөвшөөрлөөр төлбөрийн системд ашиглах зохицуулалтыг тусгасан байна.

Эх сурвалж: www.polit.mn