Б.ЗАЯА

Засгийн газрын өчигдрийн хуралдаанаар “Элэг бүтэн Монгол” үндэсний хөтөлбөрийг баталсан. Энэ асуудлаар Эрүүл мэндийн сайд А.Цогцэцэг болон холбогдох албаны хүмүүс тус хөтөлбөрийн хүрээнд хийж хэрэгжүүлэх үйл ажиллагаагаа өнөөдөр олон нийтэд танилцууллаа.

Энэ хөтөлбөрийг 2020 он хүртэл дөрвөн зорилттой 75 цогц ажлыг хийж гүйцэтгэснээр хепатитийн вирусын халдварын тархалтыг зогсоож, элэгний архаг үрэвсэл, хатуурал, хорт хавдрын шалтгаантай нас баралтыг эрс бууруулна. Одоогоор бэлтгэл ажил 90 орчим хувьтай хангагдсан бөгөөд ирэх сарын 1-ний өдрөөс улс орон даяар хэрэгжиж эхлэх юм байна.

Энэ онд 40-65 насны хүн амд, 2018 онд 15-39 насны хүн амд хепатитийн В, С вирүсийн илрүүлэг, оношилгоог үе шаттайгаар хийж, эмчилгээний зардлын 226 гаруй тэрбум төгрөгийн санхүүжилтийн 24.1 хувь нь улсын төсвөөс, 67.5 хувь нь Эрүүл мэндийн даатгалын сангаас, 3.3 хувь нь орон нутгийн төсвөөс, 3.8 хувь нь олон улсын байгууллага, гадаадын улс орны төсөл, зээл, тусламжаар, 1.3 хувь нь бусад эх үүсвэрээс санхүүжүүлэхээр тооцоолжээ.

Монгол Улсад элэгний хорт хавдар болон хатуурлын улмаас жилд дунджаар 2600 хүн, өдөр бүр долоон хүн нас бардаг судалгаа манайд бий. Энэ нь нийт нас баралтын 15 орчим хувийг эзэлж байна. Манай улсад хепатитийн вирүсийн архаг халдвар өндөр байгаа нь Монгол Улс элэгний хорт хавдрын нас баралтаар дэлхийд тэргүүлэхэд хүргэж байгаа төдийгүй цаашид элэгний хатуурал, хорт хавдрын нас баралт залуужих нөхцөл бүрдээд байна.

Тиймээс уг хөтөлбөрийн хүрээнд хепатитийн вирусын халдварын талаарх иргэдийн мэдлэгийг дээшлүүлэх, зан үйл, хандлагыг өөрчлөх, өөрийгөө болон гэр бүлийнхнийгээ халдвараас хамгаалах мэдлэг, дадалтай болгох, архаг халдвартай хүнийг илрүүлж эмчлэх, элэгний хатуурал, хорт хавдрыг эрт үед нь оношлох, эмчлэх, халдвар дамжих замыг таслан зогсоох зэрэг цогц ажлыг хийхээр төлөвлөснийг мэдээллээ.

Эх сурвалж: www.polit.mn