С.САРУУЛ

СӨХ-ны асуудлаар цөөнгүй гомдол ирж байгаа тул Өргөдлийн байнгын хорооноос шалгалт хийжээ. Шалгалтаар СӨХ-ны мөнгөө иргэд өгдөггүй, санхүүжилт дутмаг байдлаас үүдэж ажил хийх боломжгүй байдаг гэх мэт зөрчил илэрчээ. Нөгөө талаас СӨХ-д хариуцлага хүлээлгэх эрх зүйн орчин тодорхойгүй, СӨХ-д цуглаж байгаа мөнгийг юунд зарцуулдаг талаарх тайланг байдаггүй гэх мэт асуудал байгаа аж. Мөн нийтийн эзэмшлийн газрыг СӨХ-ийн дарга нь дур мэдээд зарсан тохиолдол ч гарчээ. Тиймээс СӨХ-г төр хариуцах хууль санаачилсан байна. Энэ талаар  УИХ-ын гишүүн Д.Сарангэрэл “Нэгдүгээрт, орон сууцны тухай хууль, Сууц өмчлөгчдийн тухай хууль амьдрал дээр хэрэгжихгүй байна. Хуульд цоорхой байна. Засах шаардлагатай. Хоёрдугаарт, орон сууцны асуудал хариуцсан төрийн байгууллагуудын уялдаа холбоог хангах шаардлагатай.гуравдугаарт, СӨХ ажиллах ёстой юу үгүй юу. Эсвэл төрд шилжүүлэх ёстой юм уу гэсэн дүгнэлтийг манай ажлын хэсэг гаргасан байна. Иймд Орон сууцны тухай хууль, Сууц өмчлөгчдийн холбооны тухай хуульд нэмэлт өөрчлөлт оруулахаар төлөвлөж байгаа. СӨХ-ны үйл ажиллагаанд аудит хийе гэхээр СӨХ өөрөө хуулийн этгээд биш учраас хүндрэлтэй байна гэдэг асуудлыг ажлын хэсэг хэлж байна. Тэгэхээр СӨХ хариуцлага хүлээдэггүй субъект болж таарлаа. Тиймээс энэ чиглэлийн өөрчлөлтийг хуульд тусгах зайлшгүй шаардлага байна. Дээр нь барилгын компаниуд оршин суугчдаа үл байлцуулан СӨХ байгуулдаг. Энэ нь шинээр ашиглалтад орсон байрны оршин суугчид СӨХ байгуулахгүй хугацаа алддагтай холбоотой байх. Тиймээс эдгээр асуудлын хуулийн хүрээнд засч залруулах шаардлагатай юм байна” гэв.

Эх сурвалж: www.polit.mn