С.САРУУЛ

Зэвсэгт хүчний хээрийн сургалтын төв Тавантолгойд гранат дэлбэрч, хоёр цэрэг амиа алдаж, найман цэрэг шархадсан хэрэг өчигдөр /2017.04.11/ 18:00 цагийн үед гарсан. Энэ талаар Зэвсэгт хүчний жанжин штабын орлогч дарга, хошууч генерал Ж.Бадамбазар мэдээлэл өгөхдөө “Зэвсэгт хүчний анги салбарууд ЗХЖШ-ийн батлагдсан 2016-2017 оны батлагдсан сургалт бэлтгэлийн нэгдсэн төлөвлөгөөний дагуу хээрийн сургалт дадлага, байлдааны буудлага, харвалт хийгдэж байгаа. Бүх анги салбарууд энэ сургалтынхаа төгсгөлд командлалын болон төгсгөлтийн шалгалтууд авагддаг. Зэвсэгт хүчний сургалтын төв буюу Тавантолгой дахь Зэвсэгт хүчний 311 дүгээр ангид ЗХ-ний 350 дугаар анги байлдааны буудлага хийх бэлтгэлээ хангах явцад 17.40 минутын явцад осол гарсан. Ослын шалтгааныг тогтоохоор шуурхай комисс ажиллаж байна. ЗХЖШ, Батлан хамгаалах яам, цэргийн төв эмнэлэг шаардлагатай арга хэмжээг авч ажиллаж байна. Сургалт бэлтгэлийн явцад байлдааны гранатыг цэнэгтэй  холбох дадлага явагдаж байсан. Энэ дадлагыг ахмад Н явуулж байхад тодорхойгүй шалтгааны улмаас байлдааны гранат дэлбэрсэн байна. Гранат дэлбэрэх явцах ахлагч А, Н хоёр газар дээрээ нас барсан. Бусад найман хүн шархадсан байдалтайгаар цэргийн төв эмнэлэгт хүргэгдэж ирээд шаардлагатай эмчилгээнүүдийг хийж байна” гэлээ.

Харин Цэргийн төв эмнэлгийн Эмчилгээ эрхэлсэн орлогч дарга, дэд хурандаа Т.Сүхбаатар “Осол болсон даруйд сургалтад гарч байсан эмч нар яаралтай тусламж үзүүлсэн. Одоогоор эмчлүүлэгсдийн биеийн байдал тогтвортой байна” гэсэн мэдээллийг өгөв. Энэ талаар албан ёсны мэдээллийг өнөөдөр 10:00 цагаас ЗХЖШ-аас өгөх юм байна.

Эх сурвалж: www.polit.mn