Б.ЭНХ

Нийслэлийн Залуучуудын хөгжлийн газар, “Тод-Эйч” хүүхдийн өсөлтийн клиник эмнэлэгтэй хамтран хүүхдийн өсөлтөд сөргөөр нөлөөлөх хүчин зүйлс, хорт хүнд металлын хордлого болон эрдэс минералын дутагдалын талаар Хан-Уул дүүрэгт хоёрдахь удаагийн сургалтыг зохион байгуулав. Тус сургалтад дүүргүүдийн цэцэрлэгийн багш нар, залуу эцэг эхчүүд, өрхийн эмнэлэгийн эмч нар оролцжээ.

Хүүхдийн их эмч А.Цэрэнням “Өсөлтийн хоцрогдол гэдэг бол нэг төрлийн өвчин юм. Хүүхдийн өндөр ихэвчлэн генээс шалтгаадаг боловч хооллолт, нойр, хөдөлгөөн зэрэг  хүчин зүйлийн нөлөө ч их” гэв. “Тод-Эйч” хүүхдийн өсөлтийн клиник эмнэлгийн захирал Д.Тодням эмч хүнд хорт металлын хордлогоос үүдэн хүүхдийн өсөлт төдийгүй ихэнх өвчний эх үүсвэр болдог талаар дурьдаад монгол хүүхдийн үсэнд хийсэн шинжилгээгээр хар тугалга, кадми зэрэг хорт бодисууд илэрсэн, мөн энэ хорт бодисууд нь эхээс урагт дамждаг болохыг онцолсон юм.  

Үсний эдийн хорт металл болон минералын оношилгоонд 402 хүн хамрагдсан бөгөөд нийт оношилгоонд орсон хүмүүсийн 99.2 хувь нь хорт хүнд металлын хордлоготой, 100 хувь эрдэс бодисын алдагдалтай гарчээ. Нас бага байх тусам хорт хүнд металлын хордлого илүү , нас нэмэгдэх тутам ялангуяа 18 наснаас дээш насны хүмүүст олон төрлийн эрдэс бодисын алдагдал гарч байсан талаар эмч мэргэжилтнүүд хэллээ.

Нийслэлийн залуучуудын хөгжлийн газраас Нийслэлийн Засаг дарга бөгөөд Улаанбаатар хотын Захирагчийн 2016-2020 оны мөрийн хөтөлбөрийн 4.6.3 дах хэсэгт Залуучуудын эрүүл мэндийн боловсролыг сайжруулахаар тусгагдсан байгаатай холбоотойгоор цаашид энэ сургалтыг нийслэлийн дүүргүүдэд шат дараатай зохион байгуулахаар төлөвлөжээ.  

Эх сурвалж: www.polit.mn