Т.ДАЛАЙ

Эцэг эхчүүд мэргэжил сонголтын талаарх мэдээллийг хүүхдээсээ дутахааргүй сонирхож, судалж байх хэрэгтэй талаар судлаачид зөвлөдөг. Энэ талаар Хэрэглээний сэтгэл судлалын хүрээлэнгийнсэтгэл судлаач Ц.Шүрэнцэцэгийн зөвлөгөөг хүргэж байна. 
-Ер нь эцэг эхчүүд өөрсдийн хүрээлэлд байгаа мэргэжлээ л хүүхэддээ санал болгодог. Гэтэл 6000-7000 мэргэжил байна шүү дээ. Тэдгээр мэргэжил маань таван үндсэн бүлэгт хуваагдаж байна. Хүн, техник, байгаль, шинжлэх ухаан-хэл бичвэр, урлаг гэсэн таван салбарт хуваагдаж байна. Тэгэхээр эдгээр салбар дотроо л нарийн мэргэшээд явна гэсэн үг. Жил бүр эрэлт хэрэгцээтэй байгаа 20 орчим мэргэжлийн талаар салбарын яам зарлаж байна. Эдгээрийг байнга мэддэг байхаас гадна хүүхэддээ тухайлан цаг гаргаж байгаарай. Таны хүүхэд төгсөх ангийнх бол долоо хоногоо байг гэхэд ядаж сардаа нэг удаа тухайн мэргэжлийг судлах, тэр мэргэжлийн талаар хүүхэдтэйгээ ярилцдаг байх хэрэгтэй. Гэтэл эцэг эхчүүд тэгдэггүй. Зөвхөн өөрийнхөө зүгээс мэргэжил тулгадаг. Ингэхдээ бүр конкурс эхлэхээс дөнгөж 1-2 сарын өмнө л хүүхэддээ өнөөх мэргэжлээ тулгадаг. Судалгаагүй, мэдээлэлгүйгээр мэргэжлийг нь тулгаснаар тухайн хүүхэд буруу шийдвэр, буруу сонголт хийхэд хүргэдэг юм шүү. Тиймээс эцэг эхчүүд мэргэжил сонголт гэж юу вэ гэдгийг мэргэжлийн хүмүүсээс сайтар ойлгож сонсдог байх хэрэгтэй юм. Мэргэжил сонголт гэдэг маань ганц конкурс өгөөд болчихдог зүйл биш шүү дээ. Энэ бол 7-8 төрлийн алхам хийгдэж байж болно гэсэн үг. Бүр тухайн хүүхдэд сонгох гэж байгаа мэргэжлээрээ яаж ажиллах, тухайн мэргэжлээр өдрийн найман цагаар ажиллахад юу юу хийдгийг ажлын байран дээр нь харуулж, үзүүлэх хэрэгтэй.

Эх сурвалж:www.polit.mn