Т.САЙХАН

Өнөөдөр /04.05/ Сүхбаатарын талбай бяцхан үрсийн инээд хөөр, баяр баясгалангаар бялхаж байна.  Үндэсний хувцсаараа гангарсан 3333 хүүхэд Ардын уран зохиолч Д.Пүрэвдорж агсны “Тусгаар тогтнол” шүлгийг нэгэн зэрэг уншлаа.  “Оюуны ундраа цогцолбор” сургууль 20 жилийнхээ ойг тохиолдуулан энэхүү үйл ажиллагааг зохион байгуулсан байна.

“ Ханат цагаан гэрийн од хийморийн тоонон дээр
Хасаг халуун тулганы омог дөрвөн тотгон дээр
Хан Алтай аавын онгон тэргүүн оргил дээр
Хатан Сэлэнгэ ээжийн одод орчих мандал дээр
Тусгаар тогтнол чамайг
Тунхаглан бичнэ би”  хэмээн нэгэн зэрэг уншихад Монгол хүн бүрийн сэтгэл огшихгүй байх аргагүй байлаа.  Гадаа жиндүүхэн  байсан ч ийм халуун дулаан уур амьсгалыг хүүхдүүд бий болгож чадсан юм.  Тэд “Тусгаар тогтнол” шүлгээ уншихийн зэрэгцээ  төв талбайд Монголын газрын зургийг бүтээсэн нь мөн л эх орноо гэсэн омогшлыг бадрааж байв.  Нэгдүгээр ангийн бяцхан жаалуудаас эхлээд ахлах ангийн ах эгч нар хүртэл энэ үйл ажиллагаанд идэвхитэй оролцсон юм.

Үндэстэн, ястан бүрийн дээл хувцас, өмсгөл зүүслээр гоёсон хүүхдүүд тусгаар тогтнол гэж ямар үнэ цэнэтэй зүйл байдаг вэ гэдгийг дуу хоолойгоороо хүргэлээ.

“Оюуны ундраа” сургуулийн захирал С.Нэргүйдаваа “Манай сургуулийн 20 жилийн ой болж байна. Ой болохоор л бид тоглолт хийж, ном хэвлэдэг байлаа л даа. Тиймээс бид ярилцаж байгаад Монгол Улсынхаа элгэн дээр хүүхдүүдээр “Тусгаар тогтнол” шүлгийн уншуулах нь зүйтэй юм байна гэж үзсэн. Тусгаар тогтнол бол бидний хувьд хамгийн чухал. Үүнийг багаас нь хүүхдүүдэд таниулах зорилготой. Ой тэмдэглэнэ гэдэг гурван цагийн хэлхээс юм байна. Үүнийг тусгаар тогтносон улс л хийдэг. Өмнөх үеэс суралцаж, дурсдаг байх, өнөөдөр өөрийнхөө байж чаддаг, ирээдүйг өөдрөгөөр харах хэрэгтэй” гэв.

3333 хүүхэд  оролцож байгаа  нь Монголын төрт ёсны уламжлалыг цаашид мянган жил бадрахыг бэлгэдэж байгаа аж. Мөн тус сургуулиас “Тусгаар тогтнол” цомыг бүтээсэн бөгөөд цаашид жил бүр цомоо шилжүүлэн, сурагчид төв талбайдаа тусгаар тогтнолоо тунхаглахыг уриалав.

Эх сурвалж:www.polit.mn