Б.ЗАЯА

С.Зоригийг хөнөөсөн хэргийн мөрдөн байцаалт, шүүх хурлын явцад Олон улсын парламентын холбооны Парламентчдын хүний эрхийн хороо анхаарал тавьж хуралдаанаараа хэлэлцэв. Хуралдаанд Монгол Улсын парламентыг төлөөлөн УИХ-ын гишүүн Д.Лүндээжанцан, Д.Сумъяабазар нар оролцжээ.

Хэргийн шийдвэрлэлтийн талаар УИХ-ын гишүүн Д.Лүндээжанцан мэдээлэл өгөхдөө “Энэ хэрэгт зарим хүмүүсийг сэжигтнээр тооцон, мөрдөн байцаалт явуулж, яллах дүгнэлт үйлдсэн. Одоогоор хоёр шатны шүүх хурал болоод байна. Дөрвөн хүн энэ хэргийг үйлдсэн гэж үзэж, гуравт нь ял оноогоод байгаа. Шүүх хурал хаалттай болсонд олон нийт дургүйцэж, зарим нэг эргэлзээ байгаа талаар санал бодлоо илэрхийлж байгаа. Төрийн нууцад хамаарах мэдээлэл байгаа учраас хаалттай явуулсан гэж шүүх, прокурорын байгууллага тайлбарладаг. Яллагдаж буй хүмүүс Улсын Дээд Шүүхэд өргөдөл гаргаж, хянуулах сүүлчийн шат үлдсэн” гэв.

Парламентчдын хүний эрхийн хорооны гишүүд үйлдлийн сэдэл чухам юу байсан, захиалгат аллага мөн эсэх, Дээд шүүхийн хурлыг нээлттэй явуулах боломж байгаа эсэх, улс төрийн үйл ажиллагаанд хэргийг ашиглах сонирхол байгаа гэж үзэж байна уу, мөрдөн шалгах явцад эрүүдэн шүүсэн гэсэн мэдээлэл байгаа юу, Парламентчдын хүний эрхийн хорооны гишүүд Монголд ирж, энэ хэргийн үйл явцтай танилцах боломж байгаа эсэхийг тодруулахыг хүссэн байна. Энэ дагуу манай талаас “Хэдийгээр бид парламентын гишүүн мөн ч иргэдийнхээ болон та бүхний адил л мэдээлэлтэй байна. Монгол Улсын Үндсэн хуульд хэрэг бүртгэлт, мөрдөн байцаалт, шүүн таслах үйл ажиллагаанд хэн ч хөндлөнгөөс оролцож болохгүй гэж заасан байдаг. Шүүх, прокурорын байгууллагаас хэргийг мөрдөн шалгах үйл явц хуулийн дагуу явагдсан. Нийтэд бүрэн ил болгох боломж одоогоор алга гэсэн хариуг бидэнд өгч байгаа. Мөрдөн байцаах явцад захиалагчийн тухай асуудал гарч ирсэн, түүнийг С.Зоригийн амь насыг хөнөөсөн хэргээс тусгаарлан шалгаж байгаа гэж холбогдох байгууллагууд мэдэгдэж байна. Хувь хүний хувьд хэргийг улс төрийн зорилгод хэрхэвч ашиглаж болохгүй гэсэн хатуу байр суурьтай байдаг. Хэрэг хуулийн дагуу, үнэн зөв шийдэгдээсэй, буруутан этгээд зөвөөр тогтоогдож, зохих шийтгэлээ хүлээгээсэй гэж чин сэтгэлээсээ хүсэж байна. Парламентчдын хүний эрхийн хороо Монголд очиж ажиллах боломж нээлттэй. Энэ талаар УИХ-ын удирдлагууд, Монголын парламентын хороонд танилцуулна” гэж мэдэгдлээ.

Эх сурвалж: www.polit.mn